Borattyń Qazaqstan jýrnalısteriniń qataryna qosylý armany oryndalmady

Biraq Qaraqalpaqstannyń týmasy Borat Jandaýletov atyshýly fılm shyqqannan keıin, jýrnalıst mamandyǵyna oqyp júrgen joǵary oqý ornyn tastap ketýge májbúr boldy.

Bul týraly «Ekspress K» gazetinde jaryq kórgen «Vernemsıa k nashım Boratam» (avtory - Rústem Omarov ) atty maqalady jazyldy.

- Keıde, atalmysh brıtandyq kúldirgi sońymnan qýalap júrgendeı tús kóremin, - deıdi jigit. - Ol áıelderdiń sýǵa shomylǵanda kıetin kıimin kıip,  jaǵalaý boıynsha artymnan júgiredi, sýyq terge túsip oıanyp ketemin. Al keı kezderi men ony túsimde qylqyndyryp jatamyn.

Boztirsek balada atyshýly fılm shyqpaı turyp bári jaqsy bolǵan. Onyń súıiktisi bolǵan, ol jýrnalıst nemese jazýshy bolýdy armandaǵan, tipti sýretter men reportajdardy ázirleýge kirisip te ketken. Alaıda barlyǵy bir-aq kúnniń ishinde ózgerip shyǵa keldi.

- Men bastapqyda bul kınotýndy jaıly az ǵana estigenim boldy, tipti keleke etip, osyndaı da uqsastyq bolady eken dep oıladym, - deıdi Borat. - Keıin bul týyndynyń «ataǵy» kúnnen kúnge arta bastady. Bir kúnderi oqýǵa kelsem, meni barlyǵy keleke etip, saýsaqtarymen kórsete bastady. Sóıtip men semestrdiń aıaqtalǵanyn da kútpedim, ýnıversıtetten bir-aq qashtym. Qazirgi ýaqytta onyń atyn da esime alǵym kelmeıdi.

Onyń ústine jas jigitti súıikti qyzy da tastap ketken. Ol Borat esimdi jigitpen birge júre almaıtyndyǵyn aıtqan.

- Bul Qazaqstanda óte sırek kezdesetin esim - deıdi ol. - Degenmen, men ǵalamtorda ondaǵan Boratpen dostastym. Olardyń úsheýi ıngýshtar bolsa, tórteýi qaraqalpaqtar. Olar da bul komedııanyń ómirlerine keri áserin tıgizgendigin aıtýda. Keıde men bul ázilqoı ózine basqa esim nege tańdamady eken dep oılaımyn.

Ne degenmen, birneshe jyl ótkennen keıin Borat ne bolsa da barlyǵy jaqsylyqqa jasalatyndyǵyn aıtýda - ol basqa qyzdy jolyqtyrdy, tehnıkalyq kolledjdi bitirip, munaı kompanııasynda jumys isteıdi. Al esimin aýystyrýdy oılastyrmaıdy da.