«Borat» fılmi Qazaqstan úshin úlken jeńis boldy - Syrtqy ister mınıstri
ASTANA. 23 sáýir. QazAqparat - «Borat» fılmi Qazaqstanǵa týrısterdi tartýda kóp septigin tıgizdi.
Bul týraly búgin QR Parlamenti Májilisinde ótken úkimet saǵatynda depýtattar saýalyna jaýap bergen Syrtqy ister mınıstri Erjan Qazyhanov málim etti.
Jıyn barysynda depýtat Jambyl Ahmetbekov sońǵy kezderi elimizdiń memlekettik rámizderin qorlaý faktileri shetelderde oryn alyp otyrǵanyn aıtyp: «El ishinde oryn alǵan bundaı jaǵdaıdy Qazaqstannyń zańnamasy aıasynda retteýge bolady. Al syrt elderde memlekettik nyshandardyń qorlaný faktilerin boldyrmaý sekildi sharalardy jetkilikti dárejede qadaǵalaı almaı otyrǵan sııaqtymyz?», - dedi.
Bul rette, depýtat Kýveıttegi jaǵdaı men «Borat» fılmin meńzedi.
«Men «Borat» fılmine fılosofııalyq turǵydan qaraýdy surar edim. Fılm Nıý-Iork ekranyna alǵash shyqqanda men turaqty ókil qyzmetinde júrgenmin. Sol kezde BUU Shtab-páterine barar jolda meniń de artymnan jýrnalıster júgirip, maza bermeıtin. Olarǵa men de aıttym álgi kıno shyqqaly beri Qazaqstanǵa berilgen vızalar sany kúrt, tipti 10 ecege deıin artty. Bul biz úshin úlken jeńis. Men Qazaqstanǵa týrıster tartýǵa septigin tıgizgen úshin Boratqa alǵys aıtar edim», - dedi mınıstr E. Qazyhanov.
Vedomstvo basshysynyń aıtýynsha, tipti sol tusta bir kompanııa «Borat-týr Qazaqstan» atty arnaıy týrıstik qyzmetin de jarııalaǵan eken. «Árıne, memlekettik nyshandarǵa qatysty kóterilip otyrǵan másele oryndy, aıtarlyqtaı salmaqty másele. Biz sońǵy ýaqytta oryn alǵan oqıǵalardy tyńǵylyqty zerdeledik. Ókinishke qaraı, Kýveıtte bizdiń dıplomatııalyq ókildigimiz joq. Degenmen, bizdiń barlyq elshilikterge qatań tapsyrmalar júkteldi»,- dedi E. Qazyhanov.
