Borannan uzyndyǵy 460 km elektr jelisiniń boıynda aqaý shyqty – KEGOC
EKІBASTUZ. QazAqparat - 14 sáýir kúni saǵat 23:26-da qatty boran saldarynan 500 kV L-5170 Ekibastuz – Aǵadyr elektr jelisi ajyratyldy. Jeli Qazaqstannyń 500 kV-tyń «Soltústik-Ońtústik» tranzıtine jatady. Bul týraly «KEGOC» AQ baspasóz qyzmetinen málim boldy, dep habarlaıdy QazAqparat.
Elektr jelileriniń apatqa qarsy avtomatıkasy shtattyq rejımde iske qosylǵan. Osy oraıda «Soltústik-Ońtústik» tranzıtiniń qalǵan 500 kV jelisinde shamadan tys júktelýine jol berilmedi.
Atap aıtqanda, «KEGOC» AQ personaly Qazaqstan men Qyrǵyzstannyń energetıkalyq júıeleri qýattarynyń qolda bar rezervin jedel iske qosqan. Bul turǵyda bolǵan shekteýlerdi alyp tastaý úshin tıisti jaǵdaı jasalyp, 41 mınýttan keıin, ıaǵnı 15 sáýirde saǵat 00:07-de júıelik operatordyń Ulttyq dıspetcherlik ortalyǵy qajet energııany qosty. Bul rette, tutynýshylardy elektr energııasymen qamtý tolyq kólemde qalpyna keltirildi.
Boran saldarynan zaqymdanǵan L-5170 elektr jelisin jóndeý úshin «KEGOC» AQ-nyń Soltústik jáne Ortalyq fılıaldarynyń quramyndaǵy 36 maman men 14 arnaıy tehnıkasy bar brıgadalary jumyldyryldy.
«Elektr taratý júıelik jelisiniń uzyndyǵy shamamen 460 shaqyrymdy quraıdy. Mamandar úsh ýchaskede elektr jelisi úzilgenin habarlady. Osy oraıda qalpyna keltirý jumystary júrip jatyr. Aýa raıynyń qolaısyzdyǵy oǵan kedergi keltirýde.
AO «KEGOC» avarııalyq-qalpyna keltirý jumystaryn neǵurlyq jyldam aıaqtaý boıynsha barlyq sharany qolǵa alyp jatyr», - delingen habarlamada.
