Borannan keıin tórt qalanyń áýejaılary qalypty jumystaryna kiristi
ASTANA. QazAqparat - 11 qańtar kúni soqqan borannan keıin Astana, Qaraǵandy, Kókshetaý jáne Pavlodar qalalarynyń áýejaılary shtattyq rejimdegi jumystaryna qaıta kiristi, dep habarlaıdy «QazAqparat» HAA tilshisi QR IDM Azamattyq avıatsııa komıtetiniń Feısbýktegi paraqshasyna silteme jasap.
Vedomstvonyń habarlaýynsha, turaqty reıster belgilengen kestege sáıkes oryndalýda.
Astana qalasynyń áýejaıynda azdaǵan qar men jaıaý burqasyn baıqalady. Aýa temperatýrasy -14 gradýs. Sekýndyna 7-9 metr jyldamdyqpen jel soǵýda, kóriný qashyqtyǵy - 1100 metr.
Qaraǵandy qalasynyń áýejaıynda da azdaǵan qar jaýyp, jaıaý burqasyn soǵýda. Aýa temperatýrasy -10 gradýs. Jeldiń jyldamdyǵy sekýndyna 10 metrdi kórsetse, kóriný qashyqtyǵy 1300-1600 metr aralyǵynda.
Al Kókshetaý qalasynyń áýejaıynda aýa temperatýrasy -23 gradýsty kórsetip, jeldiń jyldamdyǵy sekýndyna 8 metrdi quraýda, kóriný qashyqtyǵy - 10 shaqyrym.
Pavlodar qalasynyń áýejaıynda jaıaý burqasyn baıqalady. Aýa temperatýrasy -9 gradýs. Jeldiń jyldamdyǵy sekýndyna - 6 metr. Kóriný qashyqtyǵy - 10 km.
Eske sala ketsek, keshe aq tútek boranǵa baılanysty Astana qalasyndaǵy Nursultan Nazarbaev halyqaralyq áýejaıynyń jumysy toqtatylǵan bolatyn. Josparlanǵan 27 reıs oryndalmaı, taǵy 19-y keshiktirilgen edi. Áýejaı saǵat 17:00-de qaıta ashylyp, shtattyq rejimdegi jumysyna kiristi.
