Boranǵa baılanysty toqtaǵan Astana áýejaıy qaıta jumys isteı bastady
ASTANA. QazAqparat -Ýaqytsha jabylǵan Astana qalasyndaǵy Nursultan Nazarbaev halyqaralyq áýejaıy saǵat 17:00-de óz jumysyn qaıta bastady», dep habarlaıdy QazAqparat.
«Áýejaı saǵat 17:00-de ashyldy jáne shtattyq rejımde óz jumysyn bastady», - dedi áýejaıdyń baspasóz qyzmeti agenttik saýalyna.
Áýejaı jumysy toqtaǵan ýaqytta 19 reıs bógelip, 27 reıs toqtatylǵan. Qazirgi ýaqytta áýejaıda jol 350 metrden kórinip tur, jel jyldamdyǵy sekýndyna 14 metrdi qurady.
Buǵan deıin QR Investıtsııalar jáne damý mınıstrligi Azamattyq avıatsııa komıteti Nursultan Nazarbaev halyqaralyq áýejaıynyń jerilikti ýaqytpen saǵat 17:00-de óz jumysyn bastaıtynyn habarlaǵan edi. Áýejaı qyzmeti ushý-qoný jolaǵy men geıtterdi qardan tazartyp jatyr. Qar tazalaý tehnıkasy qarqyndy jumys istep tur.
Azamattyq avıatsııa komıtetiniń málimdeýinshe, aýa raıynyń qolaısyzdyǵy saldarynan «Eır Astana» áýe kompanııasynyń 4 reısi bógelip, 30 reısi toqtatylǵan. Onyń 14-i - halyqaralyq reıs bolǵan. SCAT áýe kompanııasynyń 9 reısi keshigip, 12 reısi keıinge qaldyrylǵan.
Eske sala ketsek, beısenbi kúni tańerteń Astana qalasyndaǵy Nursultan Nazarbaev halyqaralyq áýejaıy aýa raıyna baılanysty ushý qaýipsizdigin qamtamasyz etý maqsatynda Astana ýaqytymen saǵat 13:00-ge deıin jabyldy. Keıinirek, jabylý ýaqyty saǵat 15:00-den 17:00-ge deıin uzartyldy.
