Boranǵa baılanysty eki oblystyń aýmaǵyndaǵy respýblıkalyq joldar jabyldy
ASTANA. 26 aqpan. QazAqparat - Boranǵa baılanysty eki oblystyń aýmaǵyndaǵy respýblıkalyq joldarda qozǵalysqa shekteý qoıyldy.
Bul týraly búgin «Qazaqavtojol» RMK-nyń baspasóz qyzmetinen habarlandy.
Atap aıtqanda, Aqmola oblysynda búgin saǵat 10.45-ten bastap qolaısyz aýa raıyna (qar, boran, jol kórinisiniń shekteýligi) baılanysty avtokóliktiń barlyq túrleri úshin «Astana-Ereımentaý-Shiderti» avtojolynyń 16-205 shaqyrymyndaǵy «Astana qalasy-Pavlodar oblysynyń shekarasy» aralyǵynda jol qozǵalysyna shekteý qoıyldy.
Al Pavlodar oblysy aýmaǵynda avtokóliktiń barlyq túrleri úshin búgin myna joldardyń ýchaskeleri jabyldy:
saǵat 10.30-dan bastap «Qyzylorda-Pavlodar» jolynyń 1135-1260 shaqyrymyndaǵy «Qaraǵandy oblysy - Qalqaman aýyly» aralyǵy;
saǵat 10.30-dan bastap «Astana-Ereımentaý-Shiderti» jolynyń 205-259 shaqyrymyndaǵy «Aqmola oblysy - Shiderti» aralyǵy.
Atalǵan joldarda avtokólikterdiń úzdiksiz jol qozǵalysyn qamtamasyz etý maqsatynda «Qazaqavtojol» RMK-nyń JPB (Jol paıdalaný bólimshesi) arnaıy qar tazalaý tehnıkalary kezekshilik etýde.
«Qazaqavtojol» RMK-da avtomobıl joldarynyń jabylǵan ýchaskeleri jóninde halyqty habardar etý úshin táýlik boıy dıspetcherlik qyzmet jumys isteıdi: Astana qalasynda 8 (7172) 444-777 telefony arqyly málimet alýǵa bolady.
