Boranǵa baılanysty Qazaqstan-Reseı shekarasynda júk kólikterine shekteý qoıyldy
ORAL. KAZINFORM - Boranǵa baılanysty Qazaqstan-Reseı shekarasynda júk kólikterine shekteý qoıyldy.
QR UQK Shekara qyzmeti BQO boıynsha departamentinen málim etkenindeı, Reseı Federatsııasyndaǵy tótenshe jaǵdaılar qyzmetinen túsken málimet boıynsha boran, kóktaıǵaqqa baılanysty Samara-Tolıattı jolynda júk kólikteri úshin shekteý qoıylǵan.
«Osyǵan oraı Mashtakov halyqaralyq avtomobıl ótkizý beketinde júk kólikteriniń Qazaqstannan Reseıge ótýine shekteý engizildi. Ótkizý shamamen 21 qańtar kúngi saǵat 13.00-ge deıin toqtatylǵan. Sondyqtan júrgizýshilerge balama baǵytty tańdaýdy usynamyz. Memlekettik shekaradan Aqsaı-Elek, Shaǵan-Teploe, Tasqala-Ozınkı beketterinen ótýge bolady», - dep habarlady vedomstvodan.
Eske sala keteıik, budan buryn Batys Qazaqstanda qolaısyz aýa raıyna baılanysty 11 jol bóliginde qozǵalys shektelgenin jazǵan bolatynbyz.
