Borandy kúnde elimizdiń aımaqtarynda 11 bala men 11 balyqshy qutqaryldy
ASTANA. KAZINFORM – Qazaqstannyń kóptegen aýmaǵyn qar basyp, boran boldy. Sonyń saldarynan elimizdiń aımaqtarynda túnde kóptegen tótenshe jaǵdaılar boldy. Bul týraly QR Tótenshe jaǵdaılar mınıstrligi habarlady.
Mınıstrliktiń málimetterine qaraǵanda, aýa raıynyń qolaısyzdyǵyna qaramastan, elimizdiń ár túkpirinde muz astynan balyq aýlaýdy unatatyndar sý qoımalaryna shyqqan. Balyqshylardyń kólikteri boranda jolda turyp qalyp jatty.
Birinshi jaǵdaı Qaraǵandy oblysy Temirtaý qalasynyń mańyndaǵy Samarqand sý qoımasynda boldy. Onda eki adam jeńil kóligimen alǵa jyljı almaı, jolda qalyp qoıǵan. Ekinshisi Aqmola oblysy Arshaly aýdany Arnasaı aýyly mańyndaǵy Vıacheslav sý qoımasynda boldy. Onda áýesqoı úsh balyqshy kóligimen jolda turyp qalǵan. Úshinshisi Aqmola oblysy Ereımentaý aýdanynyń Maltabar aýylynyń qasyndaǵy Soldatskoe kólinde boldy. Onda 4 kóliktegi 6 balyqshy da qar qursaýynda qalǵan.
- Sondaı-aq búgin túnde qutqarýshylar 10 kólikti qar úıindilerinen joldyń tazartylǵan ýchaskesine súırep shyǵaryp, jaqyn mańdaǵy eldi mekenderge jetkizdi. Salondarynda 33 jolaýshy, onyń ishinde 5 bala boldy. Eshkim zardap shekken joq, - delingen habarlamada.
Oqys oqıǵalar Qostanaı oblysynyń Jangeldi, Naýyrzym aýdandarynda jáne Arqalyq qalasynyń mańynda, sondaı-aq Qaraǵandy oblysynyń Nura, Abaı aýdandarynda boldy.
Atalǵandarmen qosa, TJM mamandary tótenshe jaǵdaılar salasynyń eskertýine qaramastan jolǵa shyqqan 8 kólikti qardan súırep shyǵardy. Kólikterden 27 adamdy, onyń ishinde 11 balany evakýatsııalady.
Avarııalyq-qutqarý jumystary Aqmola oblysynyń Arshaly aýdanynda, Ulytaý oblysynyń Ulytaý aýdanynda, Qaraǵandy oblysynyń Temirtaý qalasynyń jáne Qostanaı oblysynyń Arqalyq qalasynyń mańynda júrgizildi.
Barlyq saıahatshylar jaqyn jylytý pýnktterine jetkizildi. Jedel is-qımyldar men qutqarýshylardyń ýaqtyly kómeginiń arqasynda eshkim medıtsınalyq kómekke muqtaj bolǵan joq.
TJM júrgizýshilerge saparǵa shyǵar aldynda aýa raıy boljamyn baqylap, tótenshe jaǵdaılar úshin qajetti zattardy ózimen birge alyp júrýge keńes beredi.
Osyǵan deıin aýa raıyna baılanysty 5 oblysta respýblıkalyq mańyzy bar joldarda kólik qozǵalysy shektelgeni týraly jazdyq.