Boranda jolda qalǵanda qandaı saqtyq sharalaryn eskerý kerek

NUR-SULTAN. QazAqparat –Nur-Sultan qalasy Tótenshe jaǵdaılar departamenti basqarmasynyń basshysy Baýyrjan Beısenqanov boran kezinde qar qursaýynda qalǵan avtokólikte saqtaný erejelerin túsindirdi, dep habarlaıdy QazAqparat tilshisi.

«Boran kezinde siz avtokólikpen jolda qalsańyz, kólikti toqtatyńyz, turaqty belgileńiz, ol úshin ashyq tústi mata ilý kerek. Qozǵaltqyshty radıator jaǵynan jabyńyz. Mashınanyń qozǵaltqyshyn jeldiń baǵytymen ornalastyryńyz. Osy oraıda janar-jaǵarmaıdy únemdeńiz. Qar qursaýynda qalǵan kóliktiń ishinde siz qanshalyqty tońyp qalsańyz da, birden qozǵaltqyshty iske qospańyz. Avtokóliktiń ishinde jınalǵan gazdar sizdi qatty aıazdan áldeqaıda erterek mert qylady», - dedi Baýyrjan Beısenqanov ákimdiktegi onlaın brıfıngide.

Osy oraıda ol qozǵaltqyshty otaldyryp jylyný úshin kólikten túsip, avtomobıldiń gaz shyǵatyn qubyrynyń aınalasyndaǵy qardy tazartyp, tútinniń atmosferaǵa shyǵyp jatqanyna kóz jetkizý kerektigin túsindirdi.

«Sonymen, osyndaı qarapaıym erejelerdi saqtaı otyryp, siz qysta jaraqat alý qaýpin azaıtasyz. Tótenshe jaǵdaıǵa tap bolǵanda, birden «112» qyzmetine telefon shalý kerek», - dedi Baýyrjan Beısenqanov.