Boranda jolda qalǵan 110 adam qutqaryldy - SQO
PETROPAVL. QazAqparat – Soltústik Qazaqstan oblysynda ótken táýlikte jolda qalǵan 110 adam qutqarylyp, qar qursaýynda qalǵan 39 tehnıka shyǵyaryldy, dep habarlaıdy QazAqparat tilshisi.
SQO-da bir aptadan beri boran soǵyp tur. Sol sebepti oblystyń avtojoldarynda jaǵdaı kúrdeli.
SQO tótenshe jaǵdaılar departamentiniń málimetinshe, tańǵy saǵat 8.00-de SQO-da respýblıkalyq mańyzy bar 8 jol ýchaskesi ashyldy. Qazirgi ýaqytta respýblıkalyq mańyzy bar 5 jáne barlyq oblystyq mańyzy bar joldar jabyq.
SQO TJD basqarmasynyń bastyǵy Rústem Jumaǵalıevtiń aıtýynsha, ótken táýlikte 110 adam qutqaryldy. Jergilikti atqarýshy bılik, jol qyzmetteri, polıtsııanyń jáne TJD birlesken is-qımyly arqasynda qar qursaýynda qalǵan 39 tehnıka shyǵaryldy. Eki aýdannyń Kellerovka jáne Pokrovka eldi mekenderinde jylytý pýnktteri jumys istedi.
«Aýa raıy óte qolaısyz boldy. Qol sozym jer kórinbedi. Joldy ashýǵa shyqqan tehnıkanyń sońynan qar alyp qalyp jatty. Sol sebepti qutqarý operatsııalaryna arnaıy «TREKOL» kólikterin paıdalandyq. Ǵ.Músirepov atyndaǵy aýdannyń ortalyǵy Novoıshımkadan osylaısha aýyr syrqat Shal aqyn aýdanyndaǵy Sergeevka ortalyq aýrýhanasyna jetkizildi», - deıdi Rústem Jumaǵalıev.
Qutqarý operatsııasy M. Jumabaev aýdany Malogvardeıskoe eldi mekeninde de júrgizildi. Qutqarýshylar dárigerlerge aıaqtaryn úsik shalǵan 1958 jyly týǵan er adamdy jáne qan qysymy joǵarylaǵan áıeldi ortalyq aýrýhanaǵa ákelýge kómektesti.
Jalpy patrýldeýge, joldy tazalaýǵa jáne qutqarý operatsııalaryna barlyǵy 249 qyzmetker jáne 204 tehnıka jumyldyryldy.
Buǵan deıin boran saldarynan «Petropavl-Jezqazǵan» avtojolynda birneshe kóliktiń soqtyǵysyp qalǵanyn habarlaǵan bolatynbyz.
