Boranda adasyp, úsip qalǵan elorda turǵynynyń denesi tabyldy
KÓKShETAÝ. QazAqparat - Aqmola oblysynda boranda adasyp kóz jumǵan elorda turǵynynyń múrdesi kóliginen 5 shaqyrym jerden tabyldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, aqpannyń 19-da Shortandy aýdandyq PB kezekshi bólimine Nur-Sultan qalasynyń turǵyny habarlasyp, 53 jastaǵy tanysy «Nissan Patrol» kóligimen Novokýbanka jáne Beloe ozero aýyldarynyń arasynda qarǵa batyp qalǵanyn aıtqan.
«Er adamdy qutqarýǵa polıtsııa, jergilikti atqarýshy organdar jáne turǵyndardan quralǵan arnaıy izdeý toby jáne arnaıy tehnıka men qarda júrýge arnalǵan kólik jumyldyryldy. Nátıjesinde aqpannyń 20-da er adamnyń denesi kóliginen 5 shaqyrym jerden tabyldy. Aldyn ala málimet boıynsha, er adam qar qursaýynda qalǵan kóligin tastap, jaıaý jaqyn mańyndaǵy eldimekendi izdeýge shyqqan», - dedi vedomstvodan.
Osy rette tártip saqshylary turǵyndarǵa qolaısyz aýa raıy, boran kezinde eldi mekennen tys jerlerge, jolǵa shyqpaý jóninde eskertedi. Tótenshe jaǵdaı bola qalǵan kezde «112» jáne «102» telefon nómiri arqyly qutqarý qyzmetine habarlasý kerek.
