Boranda adasyp ketken jasóspirimdi taýyp, qutqarǵan eki qaraǵandylyq polıtseı marapattaldy
QARAǴANDY. QazAqparat – Qaraǵandy oblysy polıtsııa departamentiniń bastyǵy Erlan Faızýllın Jańaarqa aýdanynda dalada borandy kúni joǵalyp ketken jasóspirimdi izdep tapqan eki polıtseıge nagrada tabys etti, dep habarlaıdy QazAqparat tilshisi.
Apparattyq keńes bastalar aldynda Qaraǵandy oblysy PD bastyǵy Erlan Faızýllın ýchaskelik polıtsııa ınspektory Jubanysh Júnisbekov pen Jańaarqa polıtsııa bóliminiń kezekshi-polıtseıi Qabı Óskenbaevqa ІІ dárejeli «Іshki ister organdarynyń úzdigi» tósbelgisin tabys etti. Polıtsııa qyzmetkerleri ІІM mınıstri Erlan Turǵymbaevtyń buıryǵymen dalada adasyp ketken jasóspirimdi qutqarǵany úshin marapattaldy.
Sondaı-aq Erlan Faızýllın polıtseılerge 100 myń teńge kóleminde syılyq tabystady.
«Uzaq ýaqyt boıy sharshaǵanyna, sýyqqa qaramastan bizdiń qyzmetkerler joǵalǵan balany izdestirdi. Olardyń ójettiliginiń, ár azamatqa degen qamqorlyǵynyń, tabandylyǵynyń arqasynda jasóspirim qutqaryldy. Olarǵa qurmet jáne madaqtaýǵa laıyq!»- dep atap ótti oblystyq PD bastyǵy.
«Qıyn boldy, biraq biz balany tabý úshin qolymyzdan kelgenniń barlyǵyn jasaýymyz kerek degen oı jibermedi. Qýanyshymyzǵa oraı ony taptyq. Bizdiń ornymyzda árbir polıtseı osylaı isteıtin edi», - dedi Jubanysh Júnisbekov.
Esterińizge sala keteıik, 16 aqpanda Qaraǵandy oblysy Jańaarqa aýdanynyń polıtsııa bólimine eki kún buryn qystaqtyń birinen 16 jasar jasóspirim ketip, qaıtyp oralmaǵany týraly habarlama kelip tústi. Osy aqparatty alǵan polıtseıler tolyq aýqymdy jedel-izdestirý is-sharalaryn uıymdastyrdy, olarǵa qolda bar barlyq kúsh pen tehnıka tartyldy. Sol kúni polıtseıler Jubanysh Júnisbekov pen Qamı Óskenbaev dalada jasóspirimdi taýyp, ony ata-anasyna jetkizdi.
