Boran, jel, kóktaıǵaq: Senbige arnalǵan aýa raıy boljamy
NUR-SULTAN. QazAqparat - Sınoptıkter 18 jeltoqsandaǵy aýa raıyna boljam jasady, dep habarlaıdy QazAqparat «Qazgıdrometke» silteme jasap.
Qazaqstannyń batysy, soltústik-batysy, soltústiginde Soltústik-batys tsıklony yqpalymen jańbyr men qar jaýady, jaıaý burqasyn soǵady.
Respýblıkanyń qalǵan aýmaǵynda antıtsıklon áserimen jaýyn-shashyn jaýmaıdy.
Eldiń keı jerlerinde jel kúsheıip, tuman túsedi, kóktaıǵaq bolady.
Aqmola oblysynyń soltústik-batysy men ońtústik-shyǵysynda kóktaıǵaq kútiledi, túnde oblystyń shyǵysynda jel ekpini 15-20 m/s deıin kúsheıedi.
Soltústik Qazaqstan oblysynyń batysy, ońtústigi, soltústiginde jaıaý burqasyn kóteriledi, tuman túsip, kóktaıǵaq bolady.
Pavlodar oblysynyń soltústigi, batysynda tuman túsedi, kóktaıǵaq bolady, túnde oblystyń ońtústiginde jeldiń kúshi - 15-20 m/s shamasynda.
Qostanaı oblysynyń soltústiginde tuman túsip, kóktaıǵaq bolady.
Shyǵys Qazaqstan oblysynyń batysynda jel jyldamdyǵy 15-20 m/s jetedi, jelmen birge jaıaý burqasyn soǵady.
Atyraý oblysynyń batysynda, kúndiz basym bóliginde - kóktaıǵaq, oblystyń batysy, soltústigi men ortalyǵynda tuman túsedi.
Batys Qazaqstan oblysynyń soltústigi, soltústik-shyǵysynda, Aqtóbe oblysynyń ońtústik-batysy, ońtústiginde tuman, kóktaıǵaq, Batys Qazaqstan oblysynda – jaıaý burqasyn kóteriledi. Qyzylorda oblysynyń soltústiginde, Qaraǵandy oblysynyń ońtústiginde, Jambyl oblysynyń soltústiginde, taýly aýdandarynda, túnde Túrkistan oblysynyń taýly aýdandarynda tuman túsedi.
Jambyl oblysynyń taýly aýdandarynda jel qarqyny - 15-20 m/s.
Almaty oblysynyń Alakól aýdanynda jel ekpini 25 m/s deıin kúsheıedi.
