Boran: Shyǵys Qazaqstandaǵy Reseımen shekaradaǵy jol jabyldy

ÓSKEMEN. QazAqparat – Shyǵys Qazaqstan oblysynda Reseımen shekaradaǵy jolda kólik qozǵalysyna tyıym salyndy, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, aýa raıynyń nasharlaýyna, naqty aıtqanda boran men joldyń durys kórinbeýine baılanysty óńirdegi tasjoldardyń biri jabyldy.

«Respýblıkalyq mańyzy bar «Óskemen-Shemonaıha-RF shekarasy» tasjolynyń 105-123 shaqyrymynda (Shemonaıha qalasy men Reseı Federatsııasy shekarasynyń aralyǵy) kóliktiń barlyq túrleriniń qozǵalysyna tyıym salyndy», - delingen aqparatta.

Osy rette, qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes berdi.