Boran: Shyǵys Qazaqstanda birqatar jol jabyldy
ÓSKEMEN. QazAqparat – Shyǵys Qazaqstan oblysynda boranǵa baılanysty birqatar respýblıkalyq mańyzdaǵy jol jabyldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, aýa raıynyń nasharlaýyna, naqty aıtqanda boran men joldyń durys kórinbeýine baılanysty óńirdegi birqatar jol jabyldy.
«Respýblıkalyq mańyzy bar «Shemonaıha-RF shekarasy» tasjolynda, Semeı qalasy men Qalbataý aýylynyń aralyǵynda jáne «Qalbataý-Ulan» tasjolynda kóliktiń barlyq túrlerine qatynaýǵa tyıym salynǵan. Sondaı-aq Gerasımovka aýyly men Semeı qalasy arasyndaǵy jolda tirkemesi jáne jartylaı tirkemesi bar júk kólikterine jáne jolaýshy tasıtyn kólikter qozǵalysyna shekteý engizildi», - delingen aqparatta.
Esterińizge sala keteıik, osyǵan deıin ShQO-da qatty jel saldarynan birinshi aýysymdaǵy oqýshylardyń mektepke barmaıtyndyǵy habarlanǵan.
