Boran men aıazda jolda qalyp qoıǵan kólik júrgizýshileri ne isteýi kerek
QOSTANAI. QazAqparat - Jyl saıyn qysqy merzimde halyq tek tómen temperatýranyń áserinen ǵana emes, sondaı-aq qar basý, boran, kóktaıǵaq sııaqty tabıǵat qubylystarynan da zardap shegedi. Qolaısyz jaǵdaıdyń qurbany bolmas úshin keıbir aýa raıy faktorlary paıda bolǵanda ne isteý kerektigin bilý kerek, dep habarlaıdy QazAqparat oblystyq TJD baspasóz qyzmetine silteme jasap.
TJ departamenti aýa raıynyń buzylatyny týraly oblys turǵyndaryn ýaqytyly qulaqtandyrǵanyna qaramastan, aımaqta oqys jaıttar tirkelip otyr.
«Bizdiń oblystyń klımaty kúrt kontınentti jáne jyldyń qys mezgilinde aýa temperatýrasy qubylýy múmkin, olar qatty qar jaýýmen jáne daýyldy jelmen ere keledi, sol úshin avtokólik joldaryn jıi qar basyp qalady. Jyldyń bul mezgilinde júrgizýshilerge asa abaı bolyp, saqtyq tanytý qajet. Qaýipsizdik sharalaryn jáne qys jaǵdaılarynda ózin-ózi qutqarý erejelerin bilmeseń, bul ártúrli tótenshe jaǵdaılarǵa ákelýi múmkin. Qys mezgilinde jolǵa shyǵar aldynda barlyǵyn egjeı-tegjeıine deıin muqııat josparlap jáne oılastyryp alyńyz», - dep eskertedi TJD baspasóz qyzmeti.
Qutqarýshylar habarlaǵandaı, avtokólik ıeleri aýa raıynyń ózgeristerin baqylaýǵa tyrysyp, meteorologııalyq málimetterdi tyńdaý qajet. Sondaı-aq, mamandar júrgizshýlerge jolda barynsha abaı bolýǵa keńes beredi.
«Qatty boranda toqtap qalǵan jaǵdaıda kólikti keri baǵytqa, ıaǵnı jelge qarsy buryp qoıyńyz. Júrgizýshige avtokólikten mezgil saıyn shyǵyp qar tazartýǵa, gaz shyǵaratyn tútik qarmen jabylyp qalmaýyn qadaǵalap, janar-jaǵar maıdy únemdep, mezgil saıyn avtokólikti jylytqan jón. Qozǵaltqyshty únemi iske qosylyp turǵan qalypta ustap turýdyń qajeti joq. Salonda mınımaldy qolaıly temperatýrany ustap turý jetkilikti. Mashınada jylý saqtalýy úshin ózińizben birge otyn quıylǵan qosymsha kanıstrany ala júrińiz. Bos júristegi zamanaýı qozǵaltqysh shamamen saǵatyna 1.5 l tutynady. Osylaısha, 20 l shamamen 12-13 jumys saǵatyna jetedi, motor ár saǵat saıyn 15 mınýttan júmys isteıtindigin eskere otyryp, siz 50 saǵatqa jýyq ýaqyt alasyz, ol ýaqyt ishinde qozǵaltqysh salondy jylytyp turady», - dep keńes beredi mamandar.
Qostanaı oblysynyń TJD úsik shalǵan ýaqytta alǵashqy kómek kórsetý joldaryn túsindirip, aıaz kezinde adam ózin qalaı saqtandyrý kerektigin eske salady.
