Boran men 40 gradýsqa deıingi aıaz: ShQO-da qańtarda aýa raıy qandaı bolady

ÓSKEMEN. KAZINFORM - Shyǵys Qazaqstan oblysynda aldaǵy aıda kún sýytyp, jıi qar jaýady.

Qańtardyń alǵashqy onkúndiginde aıaz birtindep kúsheıe bastaıdy. Túnde oblys aýmaǵynda aýa temperatýrasy –21…–26 gradýstan –26…–31 gradýsqa deıin tómendeıdi, al shyǵys jaqtaǵy aýdandarda –36 gradýsqa deıin aıaz bolýy múmkin. Kúndiz –11…–16-dan –16…–21 gradýsqa deıin sýytady.

Onkúndiktiń sońyna qaraı sýyq birshama báseńdep, túnde –13…–18, kúndiz shamamen –3…–8 gradýs bolady dep boljanyp otyr.

Ekinshi onkúndikte qys qaıta kúshine minedi. Túnde Shyǵys Qazaqstanda aýa temperatýrasy –23…–28 gradýsqa deıin tómendep, keı jerlerde –31…–36 gradýsqa jetedi, kúndiz –13…–18 gradýs shamasynda bolady. Dál osy kezeńde sınoptıkter jıi qar jaýyp, boran soǵady dep boljap otyr. Bul jol qozǵalysyna aıtarlyqtaı qıyndatýy múmkin.

- Ekinshi onkúndikte aýa raıy turaqsyz bolyp, qalyń qar jaýyp, boran jıileıdi. Júrgizýshiler men óńir turǵyndary joldyń durys kórinbeý múmkindigin jáne joldaǵy qar úıindilerin eskergeni jón, - dep habarlady «Qazgıdromet» RMK ShQO fılıalynan.

Úshinshi onkúndik aıdaǵy eń sýyq kezeń bolmaq. Túnde aýa temperatýrasy –23…–28-den –33…–38 gradýsqa deıin tómendep, oblystyń shyǵysynda –41 gradýsqa deıin jetýi yqtımal. Kúndiz –13…–18-den –23…–28 gradýsqa deıin, keı jerlerde –33 gradýsqa deıin aıaz saqtalady.

Sınoptıkterdiń málimetinshe, qańtar aıy jalpy alǵanda sýyq ári qarly bolady. Shyǵys Qazaqstan turǵyndaryna saparlaryn aldyn ala josparlap, kúrdeli aýa raıy jaǵdaılaryna daıyn bolý usynylady.

Eske salsaq, osyǵan deıin Rıdderde qarda júretin tehnıkamen taýǵa ketip adasqan 9 adam qutqarylǵany habarlanǵan.