«Boraldaı saq qorǵandary» arheologııalyq kesheni kópshilikke tanystyryldy

ALMATY. QazAqparat - Almatyda Visit Almaty týrıstik ortalyǵy  «Boraldaı saq qorǵandary» arheologııalyq keshenin tanystyrdy, dep habarlaıdy QazAqparat tilshisi.

Ashyq aspan astyndaǵy arheologııalyq park «Bolashaqqa baǵdar: rýhanı jańǵyrý» qoǵamdyq sanany jańǵyrtý baǵdarlamasy aıasynda uıymdastyrylǵan.

Qazirgi Almaty ornalasqan jerdiń tarıhy 28 000 jyldan asady. Klımatynyń jaıly, topyraǵynyń qunarly jáne sýynyń mol bolýynyń arqasynda bul jer eshqashanda bos jatpaǵan. Buǵan arheologııalyq qazbalar barysynda tabylǵan kóptegen zattar dálel. Shamamen b.z. deıingi H ǵasyrdan bastap bul jerde iri kóshpeli taıpalar - saqtar paıda bolǵan, keıinnen bulardy úısinder almastyrdy.

 

Boraldaı aımaǵynda ejelgi saqtardyń qorymdary men burynǵy turǵyn jaılary jıi kezdesedi.

Boraldaı saq qorǵandary - Almaty aýmaǵynda erte temir ǵasyrynan saqtalǵan jalǵyz eskertkish. Ol qalanyń Alataý aýdanynda, Úlken Almaty men Boraldaı ózenderiniń arasynda, áýejaıǵa jaqyn jerde ornalasqan. Munda kóne qorym bar, onyń tarıhy eki jarym myń jyldan asyp jyǵylady. Arheologııalyq keshen 47 saq jáne úısin qorǵandarynan turady. Olardyń eń úlkeniniń bıiktigi 14 metr, al dıametri 100 metrden asady.

 

Burynǵy saq taıpasynyń ómiri jańǵyrtylǵan «Boraldaı saq qorǵandary» parkinde  eki basty nysan - ortasynan jarylǵan qorǵan men ejelgi saq turǵyn úıiniń maketin kórýge bolady.

Kelýshiler ýaqytty anyqtaý úshin qoldanylǵan kún saǵatty jáne qaıta qurylǵan toqyma stanogyn tamashalaıdy.
 

«Ashyq aspan astyndaǵy «Boraldaı saq qorǵandary» arheologııalyq kesheni - mańyzdy tarıhı eskertkish. Bul týraly uzaq jyldar boıy beımálim bolyp keldi. Biregeı eskertkish  2006 jyly 3D kartany modeldeý úshin aerotúsirilim kezinde ashylǵan edi. Qazirgi sátte ol Almaty men Almaty aglomeratsııasynyń týrıstik nysandarynyń biryńǵaı tizilimine kirdi.  Almatyda 30 000-nan astam tarıhı eskertkish bar. Bul arhıtektýralyq eskertkishtiń tarıhı qundylyǵy ishki jáne sheteldik týrısterdi ózine tartady»,  - dedi VisitAlmaty ortalyǵynyń dırektory Kámıla Luqpanova.
 

Sarapshylar ol jerge qurylystar salynbaı, qıramaı eskertkishtiń osy kúnge deıin óziniń mádenı jáne tabıǵı landshaftyn saqtaǵanyn atap kórsetken.

Taıaýda «Boraldaı saq qorǵandary» Qazaqstannyń jalpyulttyq qasıetti nysandarynyń tizimine endi.
   

Sonymen qatar, arheologııalyq keshendi ıÝNESKO-nyń dúnıejúzilik mura nysandary tizimine engizý jóninde usynys berý kózdelip otyr.