Bonndaǵy murajaıdan 100-den astam eksponat urlandy
ASTANA. KAZINFORM – Bonn ýnıversıtetindegi Goldfýss paleontologııalyq murajaıynan tasqa aınalǵan 100-den astam eksponat qoldy boldy. Olardyń salmaǵy 70-ten 100 kelige deıin dep baǵalanyp otyr, al keıbireýleriniń jasy mıllıard jyldan asady, dep habarlaıdy Deutsche Welle.
BAQ habarlaýynsha, belgisiz bireýler murajaı sórelerin ashyp, eń qundy úlgilerdi urlap ketken. Bonn ýnıversıtetiniń professory Martın Langerdiń habarlaýynsha, urlanǵan qazba qaldyqtarynyń kóbiniń quny 10 myń eýrodan asady.
Qaskúnemder barlyǵy 25 kórme sóresine zaqym keltirdi: 15-iniń áınegi synǵan, al 10-y ashylǵan. Bul rette polıtsııa kireberis esikterde buzyp ashý belgilerin tapqan joq. Urylardyń ondaǵan keli eksponattardy qalaı jasyryn túrde alyp ketkeni belgisiz.
Urlyq Bonn ýnıversıtetiniń Geologııalyq ǵylymdar ınstıtýtynda jóndeý jumystary aıaqtalǵan soń anyqtaldy. Ǵımarat 2023 jyldyń jeltoqsanynan 2026 jyldyń shildesine deıin jóndeldi. Al osy ýaqyt ishinde kórme sóreleri aǵash qurylymmen jabylǵan. Murajaı qyzmetkerleri urlyqty aǵash qurylymdardy bólshektegennen keıin anyqtady.
Ýnıversıtettiń polıtsııaǵa shaǵymynan keıin kýágerlerden túsinik alyndy, olardy qazirgi ýaqytta quqyq qorǵaý organdary tekserip jatyr. Murajaı basshylyǵy urlanǵan qazbalar keıinnen mamandandyrylǵan kórmeler men bazarlarda paıda bolýy múmkin ekenin eskere otyryp, sheteldegi áriptesterine de habarlady.
Ýnıversıtet urlanǵan zattardyń fotosýretterin jarııalap, adamdardy ınternette, áleýmettik jelilerde nemese qazba jármeńkelerinde kúdikti usynystar týraly polıtsııaǵa habarlaýǵa shaqyrdy.
Bul rette murajaıdyń eń tanymal eksponattarynyń keıbirin saqtaý múmkin boldy. Alǵashqy qus, kóne jylqy jáne álemdegi eń úlken teńiz shaıanynyń túpnusqalary buryn kóshirmeler men quımalarmen aýystyrylǵan bolatyn. Qylmyskerler olardyń kóshirmelerin urlap ketken.
Eske sala ketsek, buǵan deıin Parıjdegi Lývrge ury túsip, Napaleon áshekeıleri qoldy bolǵanyn habarlaǵan edik.
Urlanǵan zattardyń arasynda frantsýz patshaıymdary men ımperatrıtsalaryna tıesili zergerlik buıymdar bar. Zergerlik buıymdardyń jalpy quny 88 mln eýroǵa baǵalandy.
