«Bonn shaqyrýy» jahandyq bastamasy ekologııalyq jaǵdaıdy jaqsartýǵa múmkindik beredi

NUR-SULTAN. QazAqparat – Qazaqstan 2018 jyly qosylǵan «Bonn shaqyrýy» jahandyq bastamasy elimizdegi ekologııalyq jaǵdaıdy jaqsartýǵa múmkindik beredi . Bul týraly Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«NurOtan» partııasynyń jańa saılaýaldy baǵdarlamasyna sáıkes ekologııa, tabıǵat resýrstaryn saqtaý, qalpyna keltirý jáne olardy tıimdi paıdalaný máselelerine zor kóńil bólinedi. Kelesi bes jylda 2 mlrd aǵash otyrǵyzý mindeti belgilengen. Parlamentke ósimdikter dúnıesiniń obektilerin saqtaý jáne utymdy paıdalaný máseleleri jónindegi zań jobasy engiziletin bolady. Ol aǵash kóshetteri men jalpy jasyl ekpelerdi paıdalaný kezinde qatynastardy retteýge jáne de zańdylyq pen quqyqtyq tártipti nyǵaıtýǵa baǵyttalǵan», - deıdi QR Premer-Mınıstri Asqar Mamın.

Ol Almatyda aǵashtar zańsyz kesilgen rezonanstyq jaǵdaı bárimizdiń esimizde ekenin aıtty.

«Onyń ústine, mundaı jaǵdaılar týraly barlyq derlik óńirlerde belsendiler, volonterler kóteredi. Dál osyǵan baılanysty Ákimshilik jáne Qylmystyq kodeksterge shuǵyl tártippen túzetýler ázirlendi, bul túzetýler boıynsha osyndaı quqyq buzýshylyqtarǵa qatysty jazalaý qatańdatylady. Kesilgen aǵashtardyń ornyna qaıtadan aǵash otyrǵyzý normalaryn da ulǵaıtý josparlanǵan. Qolda bar ósimdikter dúnıesin saqtap, orman qoryna jáne eldi mekenderde bes jylǵa arnalǵan josparlarǵa sáıkes aǵash otyrǵyzý kólemin qamtamasyz etýimiz qajet. Bul Qazaqstan 2018 jyly qosylǵan «Bonn shaqyrýy» jahandyq bastamasynyń aıasynda orman-toǵaıly aýmaqtardy kóbeıtýge, elimizdegi ekologııalyq jaǵdaıdy jaqsartýǵa múmkindik beredi», - deıdi ol.