Bombapanada janǵan azamattyq qorǵanysqa arnalǵan jabdyqtar jaramdyq merzimderiniń ótýine baılanysty 2010 jyly joıylýy tıis bolatyn - V.Krylov
ASTANA. Aqpannyń 20-sy. QazAqparat /Gúlmıra Álıakparova/ - Astana qalasyndaǵy bombapanada bolǵan órttiń shyǵý sebebin anyqtaý jónindegi komıssııanyń tekseris nátıjeleri áli shyǵarylǵan joq. Bul týraly búgin jýrnalısterdiń saýalyna jaýap bergen tótenshe jaǵdaıdyń mán-jaıyn anyqtaý úshin qurylǵan qalalyq komıssııanyń tóraǵasy, elorda ákiminiń orynbasary Vasılıı Krylov aıtty,
dep habarlaıdy QazAqparat.
«Eń aldymen, órt kezinde oryn alǵan jaǵdaıdyń barlyǵy ózderiniń (red. - qaza tapqan úsh azamat) qyzmettik jáne áskerı boryshtaryn óteý maqsatynda jasalǵandyǵy túsinikti. QR Tótenshe jaǵdaılar mınıstrliginde de órtke qarsy kúres qyzmetkerleriniń qaza tabý sebebin anyqtaý jónindegi komıssııa quryldy. Tekseris nátıjeleri usynylatyn bolady», - dedi ol.
V.Krylovtyń aıtýynsha, bambapanada 1988 jyly saqtaýǵa qoıylǵan azamattyq qorǵanysqa arnalǵan arnaıy jabdyqtar, onyń ishinde protıvogazdar men jalpy áskerı qorǵanys jınaqtary (OZK) janǵan. «Jaramdylyq merziminiń ótýine baılanysty olar jaramsyz dep tanylyp, 2010 jyly joıylýy tıis bolatyn. Kómirtek totyǵymen ýlaný qaýpi joǵary bolǵandyqtan, biz órt shyqqan kúnniń kelesi kúni mańaıda ornalasqan barlyq oqý oryndaryndaǵy sabaqty toqtattyq», - dep qosty ol.
Aıta keteıik, búgingi kúni Astana qalasynyń aýmaǵynda barlyǵy 55 bombapana ornalasqan.
