Bomba jaıly habardan soń Óskemende 20 mektep onlaınǵa kóshirildi

ÓSKEMEN. QazAqparat – Óskemen qalasynda bomba jaıly habardan soń 20 mekteptiń ekinshi aýysymdaǵy oqýshylary onlaın formatta oqıdy, dep habarlaıdy QazAqparat tilshisi.

Qala ákimdiginiń málimetine súıensek, polıtsııaǵa bomba jaıly habar túsken soń 20 mekteptiń ekinshi aýysymdaǵy oqýshylary qashyqtan bilim alýǵa kóshirildi.

«Jaǵdaı quqyq qorǵaý organdarynyń baqylaýynda. Qazirgi ýaqytta mektepterdi mamandandyrylǵan qyzmetter tekserip jatyr», - delingen aqparatta.

ShQO Tótenshe jaǵdaılar departamenti baspasóz qyzmetiniń habarlaýynsha, mektepterden evakýatsııalanǵan muǵalimder men oqýshylar aıazda tońyp qalmas úshin qutqarýshylar «Vahta» kólikterimen kelip jetti.

Eske salaıyq, búgin Óskemen qalasynda osy aptada úshinshi ret birneshe mektep ǵımaratyna bomba qoıylǵany týraly habar tústi. Qazir mamandandyrylǵan qyzmetter nysandardy tekserip jatyr.

Jarylǵyz zat týraly alǵashqy habar 6 aqpanda tústi. Ol kezde sot jáne mektep ǵımarattary jarylatyny jóninde aıtyldy. Shuǵyl qyzmetter qaýipti zattar tappady.

9 aqpanda mektepterge ornatylǵan bomba týraly habarlama taǵy tústi. Ol joly da aqparat jalǵan ekeni anyqtaldy.