Bomba týraly Qostanaı aýrýhanasyna kelgen hat feık bolyp shyqty
QOSTANAI. QazAqparat - Qostanaı oblysynyń polıtseıleri Jitiqara aýdandyq aýrýhanasynyń elektrondyq poshtasyna kelgen jarylǵysh zat týraly habarlamany tekserip jatyr, dep habarlaıdy QazAqparat tilshisi.
«Jitiqara aýdandyq polıtsııa bólimine saǵat 10.20 shamasynda aýdandyq aýrýhananyń feldsheri qońyraý shalyp, ǵımaratqa jarylǵysh zat qoıylǵan bolýy múmkindigi týraly habarlady. Habarlamany tekserý úshin oqıǵa ornyna jedel-tergeý toby men múddeli qyzmetterdiń ókilderi jumyldyryldy. Adamdar oqshaý aımaqqa kóshirildi», - dedi oblystyq Polıtsııa departamentiniń baspasóz hatshysy Irına Bejenar agenttik tilshisine.
Arnaıy qyzmet mamandary ǵımarat pen irgeles aýmaqta tekserý jumystaryn júrgizdi. Jarylǵysh qurylǵy týraly aqparat rastalmady.
«Qazirgi ýaqytta osy habarlamany jibergen tulǵalardy anyqtaý boıynsha sharalar qabyldanýda», - dedi Polıtsııa departamentinen.
Eske salsaq, búgin Jitiqara aýdandyq aýrýhanasynyń elektrondyq poshtasyna jarylǵysh zat týraly hat tústi. Ǵımarattan emdelýshiler men qyzmetkerler dereý evakýatsııalandy.
