Bomba týraly hattan keıin Qostanaı aýrýhanasynan naýqastar evakýatsııalandy
QOSTANAI. QazAqparat - Jarylǵysh zat týraly elektrondyq poshtaǵa kelip túsken hatqa baılanysty Qostanaı oblysy Jitiqara aýdandyq aýrýhanasynan emdelýshiler men qyzmetkerler evakýatsııalandy. Bul týraly QazAqparat Qostanaı oblystyq Densaýlyq saqtaý basqarmasynyń baspasóz qyzmetine silteme jasap habarlaıdy.
«Jitiqara aýdandyq ortalyq aýrýhanasynyń elektrondyq poshtasyna ǵımaratta jarylǵysh zat qoıylǵany týraly hat keldi. Saldarynan 240 adam evakýatsııalandy. Onyń ishinde jansaqtaý bólimindegi naýqastar men aýrýhana qyzmetkerleri bar», - dedi vedomstvonyń baspasóz hatshysy Ksenııa Jylqybaeva.
Aqparatqa sáıkes, hat ıesi jarylǵysh zatty iske qospaý úshin 50 myń AQSh dollaryn talap etken.
«Sizdiń ǵımaratqa jarylǵysh zat ornattyq. Aralaryńyzda bizdiń adamdar bar, olar barlyǵyn kórip otyr. Sondyqtan aqymaqtyq jasamańdar!! Bizde bári daıyn, tek túımeshekti basý ǵana qalyp otyr. Birneshe sekýndtan keıin ólgenińizdi qalamasańyz 50 000 dollar tóleńiz! Eger bir túımeshekti bassaq sizderden túk qalmaıdy. Barlyǵy bizdiń baqylaýymyzda. Eger aqymaqtyqqa jol berseńizder, dereý ǵımaratty jaramyz. Tólem úshin shot: bıtkoınmen», - delingen hatta.
Qazir aýrýhanada fakti boıynsha arnaıy qyzmet organdary jumys istep jatyr.
