Bomba týraly habar Eýropada dúrbeleń týǵyzdy: úsh eldiń telearnasy efırdi toqtatty
ASTANA. KAZINFORM — 6 qarasha, juma kúni Irlandııa, Bolgarııa jáne Ulybrıtanııadaǵy birneshe telearnanyń redaktsııasyna elektrondy poshta arqyly ǵımarattarǵa bomba qoıylǵany týraly habarlamalar túsken. Osyǵan baılanysty qyzmetkerler evakýatsııalanyp, telearnalar efırdi ýaqytsha toqtatty. Bul týraly DW agenttigi jazdy.
Reuters agenttiginiń málimetinshe, qaýip týraly habarlamalar Irlandııanyń RTÉ teleradıokompanııasyna, Ulybrıtanııanyń Sky telearnasyna, Bolgarııanyń Nova jekemenshik telearnasyna jáne basqa da BAQ ókilderine jiberilgen. Alaıda tekserý barysynda ǵımarattardyń eshqaısysynan jarylǵysh zat tabylmady.
RTÉ telearnasynyń efırinde baǵdarlamalardyń ornyna mýzyka men aldyn ala jazylǵan habarlama berildi. Keıbir arnalarda habar taratý úsh saǵatqa deıin toqtap qalǵan.
Reuters agenttigi Nova men RTÉ redaktsııalaryna joldanǵan hattyń úzindisin jarııalady:
«Biz týraly búkil álem bilgenin qalaımyz. Sondyqtan bizdiń adamdarymyzdyń biri sizderdiń ǵımarattaryńyzǵa jarylǵysh qurylǵy qoıdy. Ol 45 mınýttan keıin jarylady. Ýaqyt bastaldy».
Qaýip tóndirgen adamdardyń kim ekeni ázirge belgisiz. RTÉ men Nova telearnalaryna jiberilgen hattarǵa «Mıhaıl Andropov» degen esim qoıylǵan.
Bul oqıǵalardan bir kún buryn Eýropa elderi arasynda qatynaıtyn keminde 19 áýe reısinde bomba qoıylǵany týraly jalǵan habarlamalar taraǵan. Olardyń qatarynda Avstrııa, Belgııa, Bolgarııa, Ispanııa jáne Italııa arasyndaǵy reıster bar. Tekserý nátıjesinde ushaqtardyń eshqaısysynan jarylǵysh zat tabylmaǵan. Keıbir reıster basqa qalalarǵa baǵyttalǵan.
Máselen, Dýblınnen Rımge baǵyt alǵan Irlandııanyń Aer Lingus áýe kompanııasynyń ushaǵy Parıjden shamamen 100 shaqyrym jerdegi áskerı aerodromǵa shuǵyl qondyrylǵan.
Irlandııa premer-mınıstri Mıhol Martın Eýropa arnaıy qyzmetteri BAQ pen áýe reısterine tóngen qaýipterdiń ózara úılestirilgen shabýyldyń bir bóligi ekenin ázirge anyqtaı almaǵanyn málimdedi.
— Bul qoǵamnyń qalypty jumysyn buzyp, beıbereketsizdik týdyrýdyń qanshalyqty ońaı ekenin kórsetedi. Mundaı dástúrli emes áreketterdiń maqsaty — haos ornatyp, adamdar arasynda úreı men alańdaýshylyq týǵyzý, — dedi Martın.
Buǵan deıin Eýropada bir táýlik ishinde jeti ushaqqa bomba qoıylǵany týraly jalǵan habarlama túskeni habarlanǵan bolatyn.
