«Bomba tastalǵan sekildi»: Almaty-1 vokzalynyń jaǵdaıy turǵyndardy alańdatty
ALMATY. KAZINFORM – Almaty-1 temirjol vokzalynyń nashar jaǵdaıy qala turǵyndaryn alańdatty.
Áleýmettik jeli qoldanýshysy vokzaldyń qazirgi jaǵdaıyn kórsetip, «bomba tastalǵan sekildi» dep jazady.
«Qazaqstan temir joly» ulttyq kompanııasynyń baspasóz qyzmeti bul jaǵdaıǵa baılanysty túsinikteme berdi. QTJ jaýabyna sáıkes, QR Úkimeti qaýlysynyń aıasynda elimizdegi barlyq temirjol vokzaldarynda qaıta jańǵyrtý jumystary júrgizilip jatyr. Olardyń qatarynda Almaty-1 vokzaly da bar.
- Almaty-1 vokzaly – eldiń basty kólik toraptarynyń biri ári qalanyń ınfraqurylymynyń mańyzdy bóligi. Kúnine bul vokzal arqyly 2,5 myńnan astam jolaýshy ótedi. Nysanǵa sońǵy ret jóndeý jumystary 18 jyl buryn júrgizilgen, - dep habarlady kompanııadan.
Sondaı-aq ǵımarat pen perronnyń tehnıkalyq jaı-kúıine júrgizilgen tekserý nátıjesine sáıkes, nysannyń qurylymdaryn kúsheıtý jáne zamanaýı jaılylyq pen qaýipsizdik standarttaryna sáıkes jańartý qajet ekenin málimdedi.
Perronnyń temirbeton platformasy tolyq aýystyrýdy talap etedi. Qaıta jańǵyrtý jumystary - vokzal keshenin jańartý, jolaýshylarǵa qyzmet kórsetý jaǵdaılaryn jaqsartý, sondaı-aq nysannyń qaýipsizdik pen energııa tıimdiligin arttyrýǵa baǵyttalǵan. Halyqtyń qozǵalysy shekteýli toptaryna qoljetimdilikti arttyrýǵa jáne qazirgi sapa standarttaryn engizýge erekshe nazar aýdarylǵan.
Eske salaıyq, 2019 jyly Almaty-1 jáne Almaty-2 temirjol vokzaldary qalanyń kommýnaldyq menshigine ótti.
2023 jyly Almatynyń burynǵy ákimi Erbolat Dosaev temirjol vokzaldary «Qazaqstan temir joly» ulttyq kompanııasyna qaıtarylatyny týraly málimdedi.
2025 jyldyń 16 shildesinen bastap Almaty-1 jáne Almaty-2 temirjol vokzaldary «Qazaqstan temir joly» ulttyq kompanııasyna senimgerlik basqarýǵa berildi. Kazinform agenttigi eki nysan qalaı ózgeretinin jazdy.