Bomba bar: Qostanaıda eki aýyl turǵyny terrorızm týraly jalǵan habar taratqan
Oblystyń polıtsııa departamentiniń baspasóz qyzmetiniń habarlaýynsha, 2022 jyldyń 31 qańtarynda Jitiqara aýdany polıtsııasynyń kezekshi bólimine belgisiz er adam habarlasyp, qaladaǵy balalar oınaıtyn alańdardyń birinde lańkestik áreket jasalýy múmkin ekenin aıtqan.
«Jedel izdestirý sharalary barysynda buryn birneshe ret sottalǵan 53 jastaǵy Jitiqara qalasynyń turyǵy anyqtalyp, ustalǵan. Ol polıtsııaǵa mas kúıde qońyraý shalǵan», - dep túsindirdi departamentten.
Dál osyndaı fakt osy jyldyń 1 aqpanynda Sarykól aýdanynda tirkeldi.
«Belgisiz adam polıtsııa bóliminiń «102» pýltine habarlasyp, aýdan ortalyǵyndaǵy turǵyn úılerdiń birine bomba qoıylǵany týraly aqparat usynǵan. Júrgizilgen sharalardyń arqasynda Sarykól aýylynyń 19 jastaǵy turǵyny ustaldy, onyń buryn da osyndaı qylmys jasaǵany anyqtaldy. Ol da mas bolyp, jarylǵysh zat týraly ázildep aıtqan», - dedi polıtsııadan.
Vedomstvonyń málimdeýinshe, eki jaǵdaıda da polıtsııa, tótenshe jaǵdaı jáne jedel járdem qyzmetteri jumyldyrylǵan.
Mamandar atalǵan ǵımarattar men aýmaqty tekserip shyqqan. Tekseris qorytyndysy boıynsha, jarylǵysh zattar tabylmady.
«Atalǵan faktilerge qatysty polıtsııa Qazaqstan Respýblıkasy Qylmystyq Kodeksiniń 273-baby «Terrorızm aktisi týraly kórineý jalǵan habarlaý» boıynsha tergeýdi bastady. Bul qylmys túri boıynsha eń aýyr jaza bes jylǵa deıin bas bostandyǵynan aıyrýdy qarastyrady», - dep qorytty polıtsııa departamentinen.
