«Bomba bar»: Qyzylordada polıtseıler mektepti tekserip jatyr
QYZYLORDA. KAZINFORM - Qyzylorda qalasynda polıtsııaǵa mektepte jarylǵysh qurylǵy qoıylǵany týraly habarlama kelip túsken. Qazir ǵımarattan adamdar evakýatsııalanyp, mektep tekserilip jatyr.
Oqıǵa, búgin 10 sáýirde boldy. Polıtsııaǵa Qyzylorda qalasyndaǵy mektepterdiń birinde jarylǵysh qurylǵy salynǵany týraly habarlama kelgen.
«Oqıǵa ornyna shuǵyl túrde jedel qyzmetter jetti. Ǵımarattan adamdar evakýatsııalanyp, tekserilýde. Departament qylmystyq quqyq buzýshylyq bolyp sanalatyn terrorızm aktisi týraly jalǵan habar bergeni úshin jaýapkershilik týraly eskertedi. Ol úshin QR Qylmystyq kodeksiniń 273-babynda (Terrorızm aktisi týraly kórineý jalǵan habarlaý) jaza kózdelgen. Osy bap boıynsha 5 jylǵa deıin bas bostandyǵynan aıyrý jazasy qarastyrylǵan», - dep málim etti Qyzylorda oblystyq polıtsııa departamentinen.
Eske salsaq, bıyl Qyzylorda oblysynda 177 jer ýchaskesi memleket menshigine qaıtaryldy.
