Boljamǵa sáıkes bıyl 22 mln. tonna astyq bastyrylady - AShM
Shara barysynda 2016 jyldyń egin jınaý naýqany kórsetilip, QR Aýyl sharýashylyǵynyń birinshi vıtse-mınıstri Qaırat Aıtýǵanov sóz sóıledi.
«Aǵymdaǵy jyly aýyl sharýashylyǵy daqyldarynyń egis alqaby shamamen 21,7 mln. gektardy qurady. Bul ótken jylǵy kólemnen 445,1 myń gektarǵa artyq. Jalpy egis alqaptarynyń ólsheminde dándi daqyldardyń úlesi 15,4 mln. ga, maıly daqyldar 2,0 mln. ga, baqshalyq ónimder men kartop 426,7 mln. ga», - dep atap ótti Q.Aıtýǵanov.
Onyń aıtýynsha, qant qyzylshasy 12,9 myń ga, maqta 109,6 myń ga aýmaqqa egilgen. Búginde elimizdiń barlyq aımaǵynda jappaı egin orý naýqany júrip jatyr. Aıtalyq, 15 qyrkúıektegi jaǵdaı boıynsha 9667,1 myń ga alqap orylyp, 14,4 mln. tonna ónim bastyryldy.
Elimizdiń astyqty oblystarynda (Qostanaı oblysy, Aqmola oblysy, SQO) 7 mln. gektardan asa aýmaq oryldy jáne de jınaý naýqany jalǵastyrylýda.
Qazirgi tańda aýylsharýashylyǵy óndirýshileri 290,4 myń tonna janar-jaǵarmaıdy paıdalanýda. Jalpylaı alǵanda, kúzdik astyq bastyrý jumystaryna 391,6 myń tonna janar-jaǵarmaı jumsaý josparlanǵan.
«QazAgro» holdınginiń nesıe resýrstaryna 2016 jyly 6,8 mln. gektar alańda kóktemgi egis jáne jınaý jumystary júrgizildi. Bul osy jyly respýblıkadaǵy barlyq óńdelgen alańnyń shamamen jartysyna jýyǵy. Agrarlarǵa qarjylaı qoldaý 60 mlrd. teńge kólemindegi bıýdjettik nesıe esebinen, sondaı-aq «QazAgro» ulttyq holdınginiń bıýdjetten tys kózderiniń esebinen kórsetiledi. Osy ýaqytqa deıin holdıng respýblıkanyń aýylsharýashylyǵy taýaryn óndirýshilerdi 85,4 mlrd. teńgege qarjylandyrdy. Nesıeleýden basqa aýyl sharýashylyǵynyń lızıngi sııaqty qural belsendi iske qosylǵan. Bul baǵdarlama aıasynda aǵymdaǵy jyly fermerler jalpy 31,6 mlrd. teńge somasyna 1,7 myń birlikten astam tehnıka satyp aldy.
«Bıylǵy jylǵy qolaıly aýa-raıy eginniń bitik shyǵýyna áser etti. Aldyn ala boljam boıynsha, jalpy aýyl sharýashylyǵy daqyldarynyń jıyn-terimi 22 mln. tonnadan asýǵa tıis», - delingen habarlamada.
Sonymen qatar mınıstrlik «Azyq-túlik kelisimshart korporatsııasy» ulttyq kompanııasy» aktsıonerlik qoǵamynyń astyqty satyp alý baǵalaryn da jarııa etken. Oǵan sáıkes, kompanııanyń kommertsııalyq resýrstary kelesideı baǵalardy belgilep otyr: 3 surypty bıdaıdyń bir tonnasy 41 000 teńgeden 50 000 teńgege, 4 surypty 34 000 teńgeden 36 000 teńgege deıin, 5 surypty 30 000 teńge, al arpanyń 2 suryptysy 25 000 teńge.
Aıta keterligi, aǵymdaǵy jyly Azyq-túlik kelisimshart korporatsııasy bıdaıdy satyp alýdyń qunyn ónimniń sapasyna qaraı belgileıdi.