Boljam: Qazaqstanda bıyl 22 mln. tonnadan astam astyq jınalady

ASTANA. QazAqparat - QR Aýyl sharýashylyǵy mınıstrligi bıyl astyq daqyldarynyń jalpy túsimi 22 mln. tonnadan asady dep boljap otyr. Bul týraly vedomstvonyń birinshi vıtse-mınıstri Qaırat Aıtýǵanov málim etti.

«Aldyn ala málimetter boıynsha astyq daqyldarynyń jalpy jıyny bıyl 22 mln. tonnadan asatyny boljanady», - dedi vıtse-mınıstr brıfıngte. Onyń aıtýynsha, egin sapasy bıyl aıtarlyqtaı joǵary emes. Maýsym men shilde aıynyń ortasyna taman úsh negizgi astyq sebýshi oblystarda jaýǵan mol jaýyn-shashyn vegetatıvti massanyń qatty qalyptasýyna áser etken. Osynyń ózi astyq daqyly dániniń damý barysyn sozyp, aramshópterdiń qaptaýyna, jazdyq bıdaı egistikterinde aýrý túrleriniń taralýyna ákep soqtyrǵan. Degenmen, mınıstrlik ókili úshinshi synyptyq bıdaıdyń sapasy tómendegenimen, tórtinshi synypty bıdaı sapasy byltyrǵyǵa qaraǵanda joǵarylaǵanyn alǵa tartady.

«Aýa raıynyń jaǵdaıyna Aqmola oblysynyń dıqandary jedel den qoıdy, bul jaqsy tájirıbe. Al 4 mlrd 100 mln teńge kólemindegi gektaryna qaraı sýbsıdııalaýǵa arnalǵan qarajat gerbıtsıdterdi sýbsıdııalaýǵa baǵyttaldy», - dedi Q. Aıtýǵanov.

8 qyrkúıektegi málimetter boıynsha, astyqtyń 54 paıyzy jınalǵan. Jaǵymdy klımattyq aýa-raıy saqtalar bolsa, soltústik óńirlerde jıyn-terim qyrkúıek aıynyń úshinshi onkúndigine taman aıaqtalatyny da josparlanady.

Aıta keterligi, Qazaqstanda lıtsenzııalanǵan  204 astyq qabyldaý qoımalary bar, olardyń syıymdyly 13,6 mln tonnaǵa jetedi. Bul jańa astyqty qosa alǵanda qabyldaýǵa qoımalardyń jetkilikti ekenin bildiredi.