Bolsonarý Brazılııadaǵy prezıdent saılaýynda ulynyń kandıdatýrasyn qoldady

ASTANA. KAZINFORM — Brazılııanyń burynǵy prezıdenti Jaır Bolsonarý kelesi jyly ótetin prezıdent saılaýynda óz uly — senator Flavıo Bolsonarýdyń kandıdatýrasyn qoldaıtynyn málimdedi. Bul týraly SCMP habarlady.

Mundaı málimdemesin beısenbi kúni burynǵy memleket basshysy josparly túrde beline  hırýrgııalyq ota jasalǵannan keıin aýrýhanada jatyp joldaǵan. Dárigerlerdiń aıtýynsha, ota asqynýsyz, oıdaǵydaı ótken.

Joǵarǵy sottyń sýdıasy Aleksandr de Moraes Bolsonarýǵa ota jasaý úshin qamaýda otyrǵan jerinen ýaqytsha shyǵýyna ruqsat bergen. Medıtsınalyq mekemede bolǵan kezeńde onyń palatasyn polıtsııa qyzmetkerleri kúzetip turdy, sondaı-aq uıaly telefondar men kompıýterlerdi paıdalanýǵa shekteý qoıylǵan.

44 jastaǵy Flavıo Bolsonarý ákesiniń atymen tyǵyz baılanysty konservatıvtik saıası baǵytty jalǵastyryp, ony nyǵaıtýdy kózdeıtinin atap ótti.

Ol kelesi jylǵy 4 qazanda ótetin saılaýǵa qatysýdy josparlap otyr jáne qazirgi memleket basshysy Lýıs Inasıý Lýla da Sılvamen prezıdenttik qyzmet úshin básekege túspek.

Eske salaıyq, Bolsonarý 2022 jylǵy saılaýdan keıin Lýıs Inasıý Lýla da Sılvanyń prezıdenttik qyzmetine kirisýine kedergi keltirý maqsatynda tóńkeris uıymdastyrdy dep tanylyp, qyrkúıek aıynda sottalǵan edi. Sol kezde prokýrorlar bul astyrtyn áreket joǵary áskerı basshylyq tarapynan qoldaý bolmaǵandyqtan ǵana sátsizdikke ushyraǵanyn málimdegen.

Al 27 jylǵa sottalǵanymen, bul sheshimge apellıatsııa berip, úıqamaqta otyrǵan eks-prezıdentti bıyl qarasha aıynda polıtsııa qaıtadan qamaýǵa aldy. 

Keıinirek Brazılııa Ulttyq kongresi onyń bas bostandyǵynan aıyrý merzimin aıtarlyqtaı qysqartýdy josparlap otyrǵany belgili boldy. Ókilder palatasy men Senat onyń 27 jyldyq jazasyn eki jylǵa deıin qysqartýy múmkin zańdy qoldap daýys berdi.