Bólshektep jınady: Almatylyq dárigerler eki jasóspirimniń qolyna ota jasady
Almatyda balalarǵa shuǵyl medıtsınalyq kómek kórsetý ortalyǵynyń travmatologtary petarda jarylyp, zardap shekken 13 jáne 16 jastaǵy eki jasóspirimge ota jasady, dep habarlaıdy Kazinform.
«13 jáne 16 jastaǵy eki jasóspirim bizdiń ortalyqtyń travmatologııanyń qabyldaý bólimshesine shuǵyl túrde tústi. Eki patsıentte aralas jaraqattar boldy. Atap aıtar bolsaq, oń qoldyń ashyq synýy, oń qoldyń saýsaqaralyq keńistiginiń zaqymdanýy. Bettiń, keýde qýysynyń, eki qoldyń termııalyq kúıigi jáne travmatıkalyq shok boldy. Qabyldaý bólimshesiniń jaǵdaıynda operatsııa júrgizildi: klınıka ádisi boıynsha ishki bekitýmen súıek synyqtaryn jabyq repozıtsııalaý, sondaı-aq oń qoldyń II saýsaǵynyń tinderimen plastıka jasaldy. Biz qoldaryn bylaıynsha aıtqanda, bólikter boıynsha jınadyq. Baqytymyzǵa oraı, jasóspirimderdiń qoldaryn qutqaryp, qoldyń fýnktsııalaryn tolyq qalpyna keltire aldyq», - dedi Almaty qalalyq Balalar shuǵyl medıtsınalyq kómek ortalyǵynyń travmatology Keshirme Qýanysh.
Dárigerdiń aıtýynsha, 4 qańtar kúni jańa jyldyq jarylǵysh zattan zardap shekken taǵy úsh dos aýrýhanaǵa túsken.
Belgili bolǵanyndaı, olar aldymen isten shyqqan otshashýdy bólshektep jınamaq bolǵan, nátıjesinde úsheýi de aýyr jaraqat aldy: bireýi oń qolyn, ekinshisi betin jaraqattap aldy.
Al zardap shekken jasóspirimderdiń úshinshisine 2-3 dárejeli kóz almasynyń kontýzııasy dıagnozy qoıyldy.
«Patsıent 12 jasta. Ol kóz almasynyń kontýzııasy, kóziniń nurly qabyǵynyń III - IV dárejeli kúıigimen aýrýhanaǵa tústi. Kórý jaǵdaıy boıynsha naýqas ázirge tek aq jaryqty kóredi, kórý qabileti qalpyna keledi me, joq pa - olaı qorytyndy jasaýǵa áli erte», - dedi Almaty qalalyq Balalar shuǵyl medıtsınalyq kómek ortalyǵynyń oftalmologııa bólimshesiniń meńgerýshisi Raqymjan Kebirov.
Búgini kúni Balalar shuǵyl medıtsınalyq kómek ortalyǵynda petardalardyń jarylýynan jaraqat alǵan 5 bala jatyr. Olardyń ekeýi travmatologııa bólimshesinde, eki naýqas kúıik bólimshesinde jáne taǵy bireýi oftalmologııa bólimshesinde em qabyldaýda.
Aýrýhananyń qabyldaý bólimshesiniń derekterine sáıkes, jeltoqsan jáne qańtar aıynyń basynan bastap 7 jastan 16 jasqa deıingi 9 bala dárigerge júgingen.
