Bólshek saýda salyǵy tabys qolma-qol aqshamen alynsa - 12, kartochkamen -7, al onlaın dúkender arqyly alynsa 5 paıyzdy quraıdy

Bul týraly búgin kásipkerlikti qoldaý jónindegi respýblıkalyq qoǵamdyq keńes otyrysy barysynda Makroekonomıkalyq zertteýler ortalyǵynyń dırektory Oljas Qudaıbergenov aıtty.

«Qazirgi ýaqytta boljanyp otyrǵan salyq saıasatynda eki salyq kózdelgen. Onyń biri bólshek saýdadan basqa ekonomıkanyń barlyq salalaryn qamtıtyn, qosylǵan qun salyǵyn almastyratyn satylymnan túsetin salyq. Al bólshek saýda úshin jeke «bólshek saýda salyǵy» dep atalatyn salyq qarastyrylǵan. Ol qosylǵan qun salyǵy men korporatıvtik tabys salyǵyn almastyrady», - dedi ol.

O.Qudaıbergenovtiń sózine qaraǵanda, qosylǵan qun salyǵy -12, korporatıvtik tabys salyǵy 20 paıyzdy quraıdy. Bul jalpy, bekitilgen rejimdegi salyq kólemi. Al jeńildetilgen rejimde aınalym salyǵy nebári 3 paıyzdy quraıtyn bolady.

«Bólshek saýdada birneshe emes, tek bir ǵana salyq rejimi bolady. Al stavkanyń 12, 7 jáne 5 paıyzdyq 3 túri bolady. 12 paıyz tabys qolma-qol aqshamen, 7 paıyz kartochkamen jáne 5 paıyz onlaın dúkender arqyly alynsa qoldanylady»,- dedi ol.

Ortalyq dırektorynyń alǵa tartqan derekterine sáıkes, bólshek saýda salyǵyn engizý qosymsha 260 mlrd. teńge kiris alýǵa múmkindik beredi.