Bólshek saýda baǵalaryn belgileýdiń qoldanystaǵy ádistemesi qaıta qaralyp jatyr
NUR-SULTAN. QazAqparat – Elimizde bólshek saýda baǵalaryn belgileýdiń qoldanystaǵy ádistemesi qaıta qaralyp jatyr. Bul jaıynda Senat depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.
«Qazirgi kezde Saýda jáne ıntegratsııa mınıstrligimen shekti jáne shekti ruqsat etilgen bólshek saýda baǵalaryn belgileýdiń qoldanystaǵy ádistemesin qaıta qaraý boıynsha jumystar júrgizilýde. Saýda jáne ıntegratsııa mınıstrliginiń málimetine sáıkes, saýda ústemelerin 10 paıyzǵa deıin tómendetýge qatysty usynys bólshek saýda jelilerinde taýarlardyń tapshylyǵyna alyp kelýi múmkin. Óıtkeni keıbir áleýmettik mańyzy bar azyq-túlik taýarlary (kókónister, sút ónimderi) tez buzylatyn ónimder bolyp tabylady. Tıisinshe bul ónimderdi ótkizý tıimsiz bolýy múmkin. Bul rette, deldaldardyń sanyn qysqartý jáne ÁMAT-qa ústeme baǵany tómendetý maqsatynda Saýda jáne ıntegratsııa mınıstrligi jergilikti atqarýshy organdarmen birlesip azyq-túlik taýarlarynyń baǵa belgileýiniń búkil tizbegi boıynsha deldaldyq shemalardy anyqtaý boıynsha jumys júrgizýde», - dep atap ótedi Úkimet basshysy jaýabynda.
Onyń atap ótýinshe, deldaldyq shemalardy tergeýdi tolyq júrgizý múmkin emes. Óıtkeni shaǵyn jáne mıkro kásipkerlik sýbektilerin tekserýge moratorıı qoldanylady.
«Osyǵan baılanysty, qoldanystaǵy zańnamaǵa sáıkes, Bas prokýratýramen birlesip, saýda bazarlarynda ÁMAT baǵa belgileý tizbegindegi artyq deldaldardyń sanyn tekserý bóliginde shaǵyn jáne mıkro kásipkerlik sýbektilerin tekserýdi qaıta bastaý máselesi pysyqtalýda. Sondaı-aq, qazirgi ýaqytta Qarjy mınıstrligi elektrondyq shot-faktýralardyń aqparattyq júıesi negizinde qadaǵalanatyn ÁMAT-ty ákimshilendirýdi jetildirý jónindegi pılottyq jobany iske asyrý qaǵıdalaryn ázirleýde, bul SIM-ge óndirýshiden saýda jelilerine deıingi ÁMAT baǵasyn qadaǵalaýǵa jáne baǵa belgileý tizbeginde artyq deldaldardy alyp tastaýǵa múmkindik beredi. Osy sharalar budan ári ÁMAT-tyń túpkilikti qunynyń tómendeýine alyp kelýi tıis», - dedi Álıhan Smaıylov.
