Bólip tóleýge qosylý úshin bıznes qandaı tekseristen ótedi
ASTANA. KAZINFORM – Qazaqstanda bankter bólip tóleý jáne nesıe qyzmetin usyný kezinde bıznesti birneshe kezeń boıynsha tekseredi. Qarjy uıymdary kompanııanyń qarjylyq jaǵdaıyn, aqsha aınalymyn jáne táýekel deńgeıin baǵalap, keıin operatsııalaryna turaqty baqylaý júrgizedi. Bul týraly QR Qarjy naryǵyn retteý jáne damytý agenttigi Kazinform agenttiginiń resmı saýalyna bergen jaýabynda málim etti.
Qarjylandyrýǵa qandaı bıznes qol jetkize alady
Agenttik málimetinshe, bankpen iskerlik baılanys ornatý kezeńinde qarjy uıymdary klıentti mindetti túrde tekseredi. Bul rásim kiristerdi zańsyz jolmen alýǵa jáne terrorızmdi qarjylandyrýǵa qarsy zańnama talaptaryna sáıkes júrgiziledi.
Bank tek kompanııa ıelerin anyqtap qana qoımaıdy. Sonymen qatar bıznestiń qandaı qyzmetpen aınalysatynyn, qarjynyń qaıdan túsetinin jáne bankpen qandaı baǵytta jumys isteıtinin de tekseredi.
Budan bólek, qarjy uıymdary kásiporynnyń tirkeý jáne quryltaı qujattaryn, menshik qurylymyn, qarjylyq jaǵdaıyn, salyq tóleý tártibin, nesıe tarıhyn jáne shottaǵy aqsha aınalymyn qaraıdy. Sondaı-aq kompanııanyń qaryzy bar-joǵy da tekseriledi.
Klıenttiń táýekel deńgeıi qalaı anyqtalady
Alǵashqy tekserýden keıin bank klıenttiń táýekel deńgeıin anyqtaıdy.
Agenttik málimetinshe, bul kezde táýekelge negizdelgen tásil qoldanylady. Soǵan sáıkes ár kompanııa táýekel deńgeıine qaraı jeke sanatqa bólinedi.
Tekserý men baqylaý kólemi de osyǵan baılanysty júrgiziledi. Eger kompanııa táýekeli joǵary dep tanylsa, bank onyń operatsııalaryn muqııat baqylap, klıent týraly málimetterdi jıirek jańartady.
Sonymen qatar qarjy uıymdary kompanııanyń shottaǵy naqty operatsııalaryn onyń resmı málimdegen qyzmetimen salystyrady. Eger kúmán týdyratyn sáıkessizdik baıqalsa, qosymsha taldaý júrgiziledi.
Bankter operatsııalardy qalaı baqylaıdy
Klıentke qyzmet kórsetý kezeńinde bankter operatsııalarǵa úzdiksiz monıtorıng júrgizedi.
Osy kezde:
* kúmándi operatsııalar;
* ekonomıkalyq turǵydan negizsiz tranzaktsııalar;
* alaıaqtyq belgileri;
* jalǵan kásipkerlikke tán áreketter anyqtalady.
Bul úshin bankter avtomattandyrylǵan baqylaý júıelerin, arnaıy taldaý modelderin jáne antıfrod quraldaryn paıdalanady.
Bank baqylaýy klıentpen jumys aıaqtalǵanǵa deıin jalǵasady
Agenttik málimetinshe, bankter qoldanatyn barlyq tekserý jáne baqylaý tetigi biryńǵaı ishki júıege biriktirilgen. Bul júıe klıentpen jumys bastalǵan sátten bastap, qyzmet kórsetý tolyq aıaqtalǵanǵa deıin jumys isteıdi.
Osy kezeńde bank operatsııalardy baqylap, yqtımal táýekelderdi baǵalap otyrady. Sonymen qatar zań talaptarynyń saqtalýy, kúmándi operatsııalardyń bolýy jáne banktiń bedeline áser etýi múmkin jaǵdaılar da nazarda bolady.
Agenttik bankter men kompanııalar arasyndaǵy keıbir jumys tártibi ár banktiń ishki erejesine baılanysty ekenin de atap ótti. Mysaly, qarajat aýdarý tártibi nemese rásimdelgen bólip tóleý men nesıe boıynsha habarlama jiberý máselesin bankter ózderi sheshedi.
Aıta keteıik, buǵan deıin bank shoty buǵattalǵan jaǵdaıda qandaı áreket jasaý qajet ekeni týraly habarlanǵan edi.
