Bolmasa ózim shyǵam - Dildábekov kókpardan ulttyq quramany alǵa jeteleýge ýáde berdi
ASTANA. QazAqparat - QR Mádenıet jáne sport mınıstri Arystanbek Muhamedıuly «Kókpar» federatsııasynyń prezıdenti Muhtarhan Dildábekovty qabyldap, kezdesý barysynda kókpardyń keleshegi, aldaǵy jarystarǵa daıyndyq máselesin talqylady, dep habarlaıdy QazAqparat tilshisi.
«Elbasy Joldaýynda tapsyrǵandaı, qazirgi kezde buqaralyq sport túrlerine, onyń ishinde ulttyq sportty damytýǵa erekshe kóńil bólinip jatyr. Sonyń aıasynda, árıne, alǵa qoıǵan maqsattarymyz bar. Ózderińiz biletindeı, «Kókpar» federatsııasynyń basshylyǵyna Muhtarhan Dildábekovty shaqyryp otyrmyz. Muhtarhan bokstyń aldynda kókpar oınaǵan. Kókpardan boksqa kelip, az ýaqyt ishinde Sıdneı Olımpıadasynda kúmis júldeger boldy. Osy qaýymdastyqty basqarýǵa kelip otyrǵan Muhtarhanǵa kóp-kóp rahmet aıtamyz», - dedi mınıstr.
Arystanbek Muhamedıuly óz sózinde Astanada ıÝNESKO-nyń sheshimimen Ulttyq sport túrlerinen Olımpıada ótetinin atap ótti.
«Sońǵy kezde kókpardyń aınalasynda keleńsiz jaǵdaılar bolǵanyn bilesizder. Ony da túzetýimiz kerek. Sol sebepten ózimiz ótinish bildirip, Muhtarhan Dildábekovke usynys jasaǵan edik. Qazirgi kezde ulttyq sportty ary qaraı damytý úshin Astanada birinshi ret respýblıkalyq ulttyq sportty damytý ortalyǵyn qurdyq. Áýejaıǵa bara jatqan joldaǵy «Qazanatty» jandandyrdyq, onda ortalyq jumys istep tur. Kókpardan ol jerde Álem chempıonatyn ótkizdik. Odan basqa, EKSPO aıasynda ulttyq sport túrlerinen jarystar ótkizdik. Endigi kezekte Astanada Ulttyq sport túrlerinen ótetin Olımpıadaǵa daıyndalyp jatyrmyz», - dedi mınıstr.
Óz kezeginde «Kókpar» federatsııasynyń prezıdenti Muhtarhan Dildábekov kóptiń úmitin aqtaýǵa tyrysatynyn aıtyp ótti.
«Bala kezden kókpar tartyp, keıin oblys ortalyǵy Shymkentke kelip bokstastyq. Osy 7-8 jyldyń ishinde boks mektebinde jumys istep kele jatyrmyn. Sonymen birge, kókpardy da ıgeremiz degen úmittemiz. Kókparshyǵa oıyn kezinde jan-jaqty myqtylyq kerek. Ózińizdiń qoldaýyńyzben kókpardy kóterip, 2020 jylǵy Ulttyq olımpıadada jaqsy nátıje kórsetemiz degen nıettemiz», - dedi Muhtarhan Dildábekov mınıstrge.
Sonymen birge, Muhtarhan Dildábekov kelesi Dúnıejúzilik Kóshpendiler oıyndaryna daıyndyq myqty bolatynyna ýáde berdi.
«Bul jaqta da úlken jarystar bolyp, ekinshi, úshinshi nómirli sportshylar baryp (Qyrǵyzstanǵa), jaqsy kórsetkishke qol jetkize almady. Kelesi joly jaqsy balýandar barady. Bolmasa, ózim shyǵam», - dep ázilmen aıaqtady sózin Muhtarhan Dildábekov.
Eske sala ketsek, respýblıkalyq «Kókpar» federatsııasynyń prezıdenti bolyp Muhtarhan Dildabekov taǵaıyndalǵanyn habarlaǵan bolatynbyz. Dańqty boksshy Muhtarhan Dildábekov esimi sportsúıer qaýymǵa jaqsy tanys. Eki Olımpıada oıyndarynda baq synaǵan, Sıdneı Olımpıadasynyń kúmis júldegeri, HІІ Azııa oıyndarynyń jeńimpazy, HІV Azııa oıyndarynyń kúmis júldegeri, Álem chempıonatynyń kúmis júldegeri atanǵan ataqty boksshy Muhtarhan Dildábekov 1976 jyly Túrkistan oblysy Maqtaral aýdany, Abaı aýylynda dúnıege kelgen. Qazaqstan Respýblıkasynyń eńbek sińirgen sport sheberi. Bilimi joǵary. M.Áýezov atyndaǵy Ońtústik Qazaqstan memlekettik ýnıversıteti, Q.A.ıAsaýı atyndaǵy Halyqaralyq qazaq - túrik ýnıversıtetin támamdaǵan. «Parasat» ordeniniń ıegeri, Ońtústik Qazaqstan oblysynyń Qurmetti azamaty.
