Bollywood Qazaqstanǵa keledi: Sheteldik prodıýserler Almaty baýraıynda fılm túsirmek

ASTANA. KAZINFORM — Úndistannyń kınoóndirýshileri elimizdiń týrıstik oryndaryna qyzyǵýshylyq tanytyp otyr. Alǵashqy birlesken jobanyń túsirilimi kelesi jyly bastalady dep kútiledi. Negizgi lokatsııalar elimizdiń ásem tabıǵaty men biregeı kórinisterimen tanymal Almaty óńiriniń taýlarynda jáne jazyq dalasynda bolýy múmkin.  Bul týraly «Kazakh Tourism» UK» kompanııasy málim etti.

Úndistandaǵy 55-shi IFFI halyqaralyq kınofestıvalinde Qazaqstan týrızminiń medıa-ambassadory jáne halyqaralyq jobalardyń prodıýseri Nadıra Ahonova sheteldik kınematografısterge elimizdi perspektıvalyq baǵyt retinde tanystyrdy. Rejısserlerge, stýdııalar men memlekettik qurylymdardyń ókilderine kınoındýstrııaǵa tartymdy alań bola alatyn negizgi týrıstik oryndar kórsetildi.

– Biz Qazaqstanǵa iri halyqaralyq jobalardy tartý maqsatynda sheteldik kınoóndirýshilermen kelissózderdi belsendi júrgizip jatyrmyz. Úndistandyq prodıýserler men stýdııalar elge qyzyǵýshylyq tanytyp, kórkem jáne derekti fılmder túsirý múmkindigin qarastyryp otyr. Alǵashqy jobamyz boıynsha Almatyda rekognostsırovka júrgizilip, daladaǵy jáne taýdaǵy lokatsııalar tańdaldy. Sondaı-aq, jergilikti mamandardan quralǵan komandany qalyptastyrý bastaldy. Bul týrıstik áleýetimizdi kıno arqyly pash etýmen qatar ekijaqty shyǵarmashylyq yntymaqtastyqty damytýda mańyzdy qadamǵa aınalady, – dedi Nadıra Ahonova.

Jańa fılm Qazaqstannyń týrıstik áleýetin Úndistan turǵyndaryna jáne álemniń basqa elderine tanystyrady. Kınokartınada biregeılik, mádenı ózara árekettestik jáne adamı qundylyqtar taqyryptary qamtylady.

Halyqaralyq jobanyń túsirilimi Qazaqstannyń tartymdy kreatıvtik alań retindegi ımıdjin nyǵaıtýǵa septigin tıgizedi.

Eske sala keteıik, buǵan deıin Qazaqstan Úndistannan keletin qysqy saıahatshylar úshin tartymdy baǵytqa aınalǵanyn jazdyq.