Bolıvııanyń 1,7 mln gektar jeri órtendi
NUR-SULTAN. QazAqparat - Bolıvııa jeriniń 1,7 mıllıon gektary qyzyl jalynǵa oranyp, jasyl ormandar kúlge aınaldy, dep habarlaıdy CNN.
Órt shyqqan jerdiń bári ný orman, áli meńgerilip úlgermegen jabaıy tabıǵat aıasy – Amazonkanyń bir bólshegi edi.
Bolıvııalyq Santa-Krýs aımaǵynyń veb-saıtynda órtten keıin ishetin sý, jeıtin tamaq izdep júrgen jan-janýarlardyń sýretteri kórsetilgen. Qorshaǵan ortany qorǵaý mınıstri Sıntııa Asın «ulttyq apatty jaǵdaı» oryn alǵanyn aıtyp, ósimdikter men janýarlardyń kóptegen túrinen aıyrylyp qalatyn boldyq dep, dabyl qaǵýda. Mınıstrdiń aıtýynsha, myńdaǵan órt sóndirý qyzmetkeri, orman kúzetshileri, memlekettik qyzmetkerler men eriktiler órtpen kúresý ústinde. Alaıda, qyzyl jalynnyń jańa oshaqtary kúnde anyqtalyp, tolastar emes.
Bolıvııa prezıdenti Evo Morales eki aptaǵa sozylyp jatqan osy órttiń kesirinen 2 adam qaza tapqanyn aıtty.
Bul memleketke kórshi elder de qolushyn sozǵan. Argentına, Perý, AQSh órt sóndirý quraldary men tikushaqtaryn, órt sóndirýshilerin jedel jóneltken. Alaıda, tamyz aıynyń aıaǵynda bastalǵan órt tolyq sóndirilgen joq.
Aıta keterligi, Amazonka ný ormandaryna 8 ońtústik amerıkalyq memleket ıe. Ormandardyń basym bóligi Brazılııanyń enshisinde.
