Bolıvııadaǵy prezıdent saılaýynda Rodrıgo Pas jeńiske jetti

ASTANA. KAZINFORM — Bolıvııadaǵy prezıdent saılaýynyń ekinshi kezeńinde senator Rodrıgo Pas 97,53% daýys jınap, jeńiske jetti, dep habarlaıdy TASS agenttigi.

Ońtústik Amerıka Joǵarǵy saılaý sotynyń málimetinshe, tsentrıstik Hrıstıan-demokratııalyq partııadan Pasqa 54,54% daýys berilse, 45,46% burynǵy prezıdent (2001-2002), ońshyl «Bostandyq jáne demokratııa» alıansynyń ókili Horhe Kırogaǵa berildi.

Joǵarǵy saılaý sotynyń tóraǵasy Oskar Assenteýfel baspasóz máslıhatynda sanaý nátıjeleri aldyn ala bolǵanymen, «tendentsııa qaıtymsyz» dep málimdedi.

Rodrıgo Pas Bolıvııanyń burynǵy prezıdenti Haıme Pas Samoranyń uly. Ol eldi 1989-1993 jyldar aralyǵynda basqarǵan. Rodrıgo Pas salyq túsimderin aımaqtar men mýnıtsıpalıtetterge qaıta bólý arqyly ekonomıkany ortalyqsyzdandyrýdy, sondaı-aq qoljetimdi nesıeler baǵdarlamasyn engizýdi, shaǵyn jáne orta bıznesti qoldaýǵa salyq jeńildikterin berýdi usynady.

Bul rette saıasatker óz baǵdarlamasyn júzege asyrý úshin halyqaralyq qarjy ınstıtýttarynyń nesıelerin paıdalanýǵa qarsy. Pas Bolıvııanyń Amerıka Qurama Shtattarymen qarym-qatynasty qalpyna keltirýge jáne aımaqtyq yntymaqtastyqty, onyń ishinde Ońtústik Amerıkanyń ortaq naryǵy (Merkosýr) aıasynda damytýǵa basymdyq bere otyryp, álemniń basqa elderimen baılanysyn jandandyrý qajet dep sanaıdy.

Saılanǵan prezıdent 8 qarashada qyzmetine kirisedi.

Eske sala keteıik, Sırııada Bashar Asad bılikten ketkennen keıingi alǵashqy parlamenttik saılaý ótti.