Bolıvııadaǵy nóser jaýynnan keıingi sý tasqyny: qaza tapqandar bar
ASTANA. KAZINFORM – Bolıvııada tolassyz jaýǵan nóser jańbyr saldarynan bolǵan sý tasqynynyń kesirinen keminde 20 adam qaza tapty, dep habarlaıdy Anadolu Ajansı.
Bolıvııanyń azamattyq qorǵanys jónindegi vıtse-mınıstri Alfredo Trocheniń jergilikti BAQ-qa málimdeýinshe, Santa-Krýs qalasynda Pıraı ózeniniń arnasynan asyp ketýine baılanysty iri sý tasqyny oryn alǵan. Tabıǵı apat saldarynan 20 adam kóz jumyp, kóptegen turǵyn iz-túzsiz joǵalǵandar qatarynda.
Alfredo Troche izdestirý-qutqarý jumystary táýlik boıy úzdiksiz júrgizilip jatqanyn aıtyp, qaza tapqandardyń jaqyndaryna kóńil aıtty.
Óz kezeginde Bolıvııa prezıdenti Rodrıgo Pas óńirdegi ahýaldy turaqty baqylaý maqsatynda Daǵdarys jáne monıtorıng ortalyǵyn qurý týraly sheshim qabyldaǵanyn málimdedi. Memleket basshysynyń aıtýynsha, sý tasqynynan zardap shekken aımaqtarda ulttyq deńgeıdegi tótenshe jaǵdaı rejımin engizý máselesi qarastyrylyp jatyr.
Prezıdent sondaı-aq El-Nıno men La-Nınıa klımattyq qubylystarynyń saldary áli de sezilip otyrǵanyn atap ótip, aldaǵy úsh-bes aıda nóser jaýyn-shashyn jaýyp, keıin qýańshylyq bolýy múmkin ekenin eskertti.
Bılik ókilderi qaza tapqandar sany artýy yqtımal ekenin joqqa shyǵarmaıdy. Aldyn ala baǵalaý boıynsha, sý tasqynynan kelgen materıaldyq shyǵyn kólemi birneshe mıllıon dollardy quraıdy.
Buǵan deıin Marokkoda da nóser jańbyrdan keıingi tosyn sý tasqyny saldarynan 37 adamnyń qaza tapqany habarlanǵan.