Bolıvııada qatty jaýǵan nóser saldarynan 46 adam qaza tapty
ASTANA. QazAqparat - Bolıvııada úzdiksiz jaýǵan jaýynnyń saldarynan 46 adam ajal qushty, al 28 myń adam úı-jaılaryn tastap ketýge májbúr boldy, dep jazady RBK Bı-Bı-Sı-ge silteme jasap.
Tabıǵat kesapatynan Amazon aımaǵy Benı, Kochabamba provıntsııasynyń ortalyǵy men La-Pas provıntsııasynyń soltústik bóligi qatty zardap shekken. Bolıvııanyń azamattyq qorǵanys mınıstrliginiń orynbasary Oskar Kabrera habarlaǵandaı, nóser 90 mýnıtsıpaldy qurylymnyń 14 myń ga jerin joıǵan. Benıde apat saldarynan shamamen 1 myń iri qara bas mal joıyldy. Joldardyń shaıylyp ketýinen kóptegen shalǵaı aýdandarǵa jetý múmkin bolmaı qaldy.
Alapat qurbandarynyń sany elde jaýyn-shashyn maýsymy bastalǵan 2013 jyldyń qazan aıynan beri artyp keledi. Eń sońǵy ret Potosı aımaǵynda tasyǵan ózenge aǵyp ketken 10 jasar qyzdyń múrdesi tabyldy, onyń baýyrlary men sýǵa aǵyp ketken basqa da adamdar áli izdestirilýde.
Bolıvııa úkimeti elde tótenshe jaǵdaı jarııalady. Densaýlyq saqtaý mınıstrligi Benıge dári-dármekter men shuǵyl kómek kórsetetin brıgada toptaryn jiberýde.
