Bolıvııada aqsha tasymaldaǵan ushaq apatqa ushyrap, 15 adam qaza tapty
ASTANA. KAZINFORM — Bolıvııanyń Áýe kúshterine tıesili ushaq La-Pasqa jaqyn ornalasqan El-Alto áýejaıyna qoný kezinde apatqa ushyrady. Bul týraly BBC jazdy.
Jergilikti avıatsııa basqarmasynyń málimetinshe, ushaq ushý-qoný jolaǵynan shyǵyp, tasjoldyń jıegine shyǵyp ketken, artynsha órtke oranǵan. Apat kezinde jolda kele jatqan kólikterdiń de zaqymdanǵany habarlandy. Qutqarýshylardyń málimetinshe, apattan keminde 15 adam qaza tapqan, onyń ishinde ushaqtyń ekıpaj músheleri men kólikterde bolǵan adamdar da bar.
Jergilikti Unitel telearnasynyń habarlaýynsha, ushaq Bolıvııanyń ortalyq bankine tapsyrys boıynsha jańa banknottardy La-Pasqa jetkizgen. Ushaq apatqa ushyraǵannan keıin aqshalar aınalaǵa shashylyp qalǵan. Oqıǵa ornynda kópshilik jınalyp, banknottardy jınaýǵa tyrysqan, polıtsııa halyqty taratý úshin kóz jasaýratatyn gaz qoldanýǵa májbúr bolǵan.
Keıinirek Bolıvııanyń ortalyq bankiniń basshysy Davıd Espınosa bul ushaqpen tasymaldanǵan banknottardyń jaramsyz ekenin jáne olar tólem retinde qabyldanbaıtynyn málimdedi.
Ótken jyldyń sońynda AQSh-tyń Florıda shtatynda ıAmaıkaǵa arnalǵan gýmanıtarlyq kómek tasymaldaǵan ushaq turǵyn úıdiń artqy aýlasyna qulap ketken bolatyn.
Jaqynda Iranda áskerı tikushaq apatynan tórt adam qaza tapty.
