Bolıvııa sý tasqyny men kóshkinge baılanysty tótenshe jaǵdaı jarııalady
ASTANA. KAZINFORM — Bolıvııa bıligi nóser jaýyn saldarynan bolǵan sý tasqyny men kóshkinge baılanysty tótenshe jaǵdaı jarııalady, dep habarlaıdy Anadoly.
Bolıvııa prezıdenti Lýıs Arse 2024 jyldyń qarashasynan beri tabıǵı apattar saldarynan 51 adam qaza taýyp, 378 885 otbasy zardap shekkenin aıtty. Memleket basshysynyń aıtýynsha, tótenshe jaǵdaıdyń engizilýi zardap shekken aımaqtarǵa tehnıkalyq, logıstıkalyq jáne qarjylyq resýrstardy tez arada jetkizýge múmkindik beredi.
Memleket basshysy eldiń 9 oblysyndaǵy 209 qalaǵa eleýli materıaldyq shyǵyn kelgenin atap ótti. Apat zardaptaryn joıýǵa 4 myńnan astam adam jumyldyrylyp, zardap shekken aımaqtarǵa 234 tonna gýmanıtarlyq kómek jetkizildi.
Jergilikti aqparat quraldary Bolıvııa astanasy La-Pasta birneshe aı boıy tolassyz jaýǵan jaýyn-shashyn saldarynan birneshe úı qırap qalǵanyn habarlady.
Buǵan qosa, ótken aptada Bolıvııa Senaty tabıǵı apattarǵa, sonyń ishinde qatty jańbyr men sý tasqynyna kómektesý úshin Latyn Amerıkasy men Karıb basseıni damý bankinen 75 mıllıon dollar (shamamen 520 mıllıon bolıvıano) bólinýin maquldady.
Buǵan deıin Bolıvııada nóser jaýyn saldarynan 16 adam mert bolǵanyn jazǵan edik.