Bolıvııa prezıdenti Evo Morales otstavkaǵa ketti
SÝKRE. QazAqparat – Bolıvııa prezıdenti Evo Morales ótken aıda ótken prezıdenttik saılaý barysynda «aıtarlyqtaı zań buzýshylyqtar» bolǵany týraly jarııalanǵannan keıin jeksenbi kúni otstavkaǵa ketti, dep habarlaıdy QazAqparat CNN-ge silteme jasap.
Morales 20 qazanda prezıdent saılaýynan keıin bolǵan narazylyqtarǵa baılanysty «eldiń ıgiligi úshin» otsavkaǵa ketetinin málimdedi. Narazylyqtarda úsh adam qaza taýyp, júzdegen adam jaraqat aldy. Sondaı-aq, Morales elden ketý josparynda joq ekenin atap ótti.
«Meniń qashýǵa eshqandaı sebebim joq. Bolıvııa halqy eshkimdi tonamaǵanymdy bilgenin qalaımyn. Eger kim de kim bizdi urlyq jasady dep oılaıtyn bolsa, ózime kelip aıtsyn. Dálelder ákelsin», - dedi ol.
Jeksenbi kúni narazylyqtarǵa baılanysty Bolıvııa qarýly kúshteriniń qolbasshysy komandır Ýılıams Kalıman memlekette turaqtylyq pen beıbitshilik ornatý úshin Moralestiń otstavkaǵa ketýin surady.
Sherýshiler men Bolıvııa oppozıtsııasy saılaý bıligin eldiń burynnan kele jatqan sotsıalıstik kóshbasshysy Moralestiń paıdasyna daýys sanaýdy manıpýlıatsııalady dep aıyptady. Ol Latyn Amerıkasyndaǵy eń ejelgi memleket basshylarynyń biri - Morales eldi 14 jyldan beri basqaryp keledi. Moralestiń otstavkaǵa ketkeni týraly habar jarııalanǵannan keıin, eldegi adamdar bul jańalyqty toılaı bastady. Vıtse-prezıdent Alvaro Garsııa Lınera Moralestiń otstavkasynan keıin birneshe mınýt ótken soń otstavkaǵa ketetinin jarııa etti. Senat prezıdenti Adrıana Salvaterra Arrıaza da, Depýtattar palatasynyń prezıdenti Vıktor Borde de jeksenbi kúni otstavkaǵa ketti. Jergilikti BAQ aldynda suhbat bergen Bolıvııa senatynyń ekinshi vıtse-prezıdenti Janın Anes prezıdent bolýǵa kezeginiń kelgenin aıtty. Oppozıtsııa depýtaty Anes jańa saılaý ótkizý maqsatynda prezıdent qyzmetine kirisetinin málimdedi.
