Bólingen qarajattyń paıdalanylýyna baqylaý men monıtorıng kúsheıtiledi - Májilis
Zań jobasy Parlamenttiń, Esep komıtetiniń, sondaı-aq Ekonomıkalyq yntymaqtastyq jáne damý uıymynyń usynystaryn iske asyrýǵa baǵyttalǵan.
Qujat Bıýdjet kodeksine tıisti baǵyttar boıynsha túzetýlerdi kózdeıdi, ıaǵnı bıýdjettik táýekelder men memlekettik qarjynyń turaqtylyǵy týraly taldamalyq esepti qalyptastyrý eskerilgen.
«Bıýdjettik táýekelder men memlekettik qarjynyń turaqtylyǵy týraly esepti jyl saıyn Parlamentke respýblıkalyq bıýdjettiń jobasymen engizý usynylady. Qujatta memlekettik qarjy jaǵdaıyna áser etetin makroekonomıkalyq, demografııalyq, qarjylyq jáne basqa da táýekelderdiń taldaýy qamtylatyn bolady. Osyndaı qujatty qalyptastyrý bıýdjettik táýekelderdi tıimdi basqarýǵa jáne olardy bıýdjettik sheshimder qabyldaý kezinde eskerýge múmkindik beredi», - dedi Ulttyq ekonomıka mınıstri Áset Armanuly Erǵalıev.
Onyń aıtýynsha, bıýdjetaralyq qatynastardy jetildirý aıasynda jergilikti atqarýshy organdarǵa jergilikti bıýdjetten qarjylandyrýdyń eń az kólemde belgilengen jalpy sıpattaǵy transfertter qarajatyn basqa shyǵystarǵa qaıta bólý múmkindigin berý usynylyp otyr.
«Strategııalyq josparlardy sapaly josparlaý jáne oryndaý maqsatynda, bólingen qarajat tolyq ıgerilmegen jaǵdaıda, jyl sońynda respýblıkalyq bıýdjetke keri qaıtarýyna baılanysty, tórtinshi toqsanda strategııalyq josparlardyń nysanaly ındıkatorlaryn ózgertýge tyıym salynady», - dep túsindirdi mınıstr.
Budan bólek, memlekettik qoldaý sharalary aıasynda bólingen qarajattyń paıdalanylýyna baqylaý men monıtorıngti kúsheıtý maqsatynda memlekettik baǵdarlamalardy qarjylaı jáne qarjylaı emes qoldaý operatorlaryna, sondaı-aq qaryz alýǵa memleket kepildik bergen kvazımemlekettik sektor sýbektilerine qazynashylyqta shottar ashý kózdelip otyr.
