Bólingen qarajatty ıgere almaı jatqan mınıstrlikter men óńirler ataldy
«Memlekettik bıýdjettiń shyǵystary 98,8%-ǵa, respýblıkalyq bıýdjettiń shyǵystary - 99,7%-ǵa, jergilikti bıýdjetterdiń shyǵystary – 98%-ǵa atqaryldy. Respýblıkalyq bıýdjettiń shyǵystary 11 trln 284 mlrd teńgeni qurady. 32 mlrd teńge boıynsha jumys atqarylmaǵan. Onyń ishinde únemdeý – 8 mlrd teńge bolsa, ıgerilmegeni – 24 mlrd teńge», - dedi Erulan Jamaýbaev Úkimet otyrysynda.
Mınıstrdiń aıtýynsha iri somadaǵy qarajatty ıgere almaý iri somasy mynadaı ortalyq memlekettik organdarda qalyptasqan: Qarjy mınıstrligi – 2 mlrd teńge, Aýyl sharýashylyǵy mınıstrligi – 1,9 mlrd teńge, Ádilet mınıstrligi – 1,6 mlrd teńge, Tsıfrlyq damý, ınnovatsııalar jáne aeroǵarysh ónerkásibi mınıstrligi – 1,2 mlrd teńge, Ekologııa, geologııa jáne tabıǵı resýrstar mınıstrligi – 1,1 mlrd teńge.
«Qarajattyń ıgerilmeýiniń negizgi sebepteri: konkýrstyq rásimderdi, sharttardy jasasý rásimderin uzaq ótkizý, oryndalǵan jumystar aktilerin usynbaý, sotta memlekettiń múddesin qorǵaý jónindegi talap-aryz jumystarynyń júrgizilýi, naqty kórsetilgen qyzmetter kólemi, oryndalǵan jumystar úshin aqy tóleýdiń sozylýy», - dedi ol.
Sondaı-aq Jamaýbaev óńirlerde de taǵy 24 mlrd teńge ıgerilmeı jatqanyn málim etti. Qarajatty ıgermeýdiń eń joǵary kórsetkishi myna óńirlerde qalyptasqan: Aqtóbe oblysynda – 3,2 mlrd teńge, Almaty qalasynda – 3 mlrd teńge, Soltústik Qazaqstan – 2,5 mlrd teńge, Batys Qazaqstan – 2,3 mlrd teńge, Túrkistan oblystarynda – 1,9 mlrd teńge.
«Qarjy jylynyń aıaqtalýyna deıin az ýaqyt qaldy. Osyǵan oraı ortalyq memlekettik organdar men jergilikti atqarýshy organdar josparlanǵan qarajatty ǵana emes, sondaı-aq Úkimet rezervinen bólingen aqshany da ıgerýdi jedeldetýi qajet ekenin eske salamyn», - dedi ol.
