Bólimshe komandırleriniń kýrstyq daıarlyǵynyń ekinshi kezeńi aıaqtaldy - QR QM (FOTO)

ASTANA. QazAqparat - «Ońtústik» óńirlik qolbasshylyǵynyń jumyldyrý rezervin daıarlaý oqý-jattyǵý ortalyǵynda kásibı daǵdylary men jaýyngerlik sheberlikterin shyńdaǵan bólimshe komandırleriniń kýrstyq daıarlyǵy aıaqtaldy, dep habarlaıdy QR QM baspasóz qyzmeti.

QR Qarýly Kúshterinde zamanaýı tehnıkany paıdalanatyn jeke quramnyń joǵary kásibı daıarlyǵyna erekshe kóńil bólinedi. Óıtkeni, oǵan jumsalǵan áleýettiń iske asyrylý múmkindigi tikeleı kásibı daıarlyqqa baılanysty.

Bólimshe komandırleri serjanttar quramynyń kýrstyq daıarlyǵynan aı saıyn ótedi.

Jeke qurammen jaýyngerlik daıarlyq boıynsha sabaqtardy saýatty uıymdastyrýǵa, serjanttar quramynyń daıyndyq deńgeıiniń tekserilýine, sabaqtardy ótkizýdiń biryńǵaı ádistemesiniń ázirlenýine, jeke qurammen tárbıe jáne jeke jumysty uıymdastyrýda serjanttardy oqyp-úıretýge jiti nazar aýdaryldy.

«Ońtústik» óńirlik qolbasshylyǵynyń áskerler bólimshesiniń 27 komandıri kýrstyq daıarlyqtan ótkenderi týraly kýálik aldy.

Búgingi kúni elimizdiń Qarýly Kúshterinde tárbıeshilermen qatar jeke qurammen jumys jasaý boıynsha kúrdeli tapsyrmalar júktelgen komandırlerdiń róli nyǵaıyp kele jatqanyn aıta keteıik. Áskerlerde bólimshe komandıri óziniń shaǵyn ǵana áskerı ujymynda oqý úderisin uıymdastyrady. Beıbit jáne soǵys ýaqytynda ol bólimsheniń jaýyngerlik ázirligine jáne olardyń jaýyngerlik tapsyrmalardy sátti oryndaýyna, jaýyngerlik daıarlyqqa, tárbıege, áskerı tártip pen jeke quramnyń moraldyq-psıhologııalyq jaǵdaıyna, sondaı-aq qarý-jaraqtyń, áskerı tehnıkanyń saqtalýy men jaı-kúıine jaýap beredi.