Bolgarkamen kesken: Elordada tólem termınalynyń aqsha salatyn jáshigi urlandy

NUR-SULTAN. QazAqparat – Elordada qaskúnemder tólem termınalyn buzyp, aqsha salatyn jáshigin urlap ketti. Bul týraly Nur-Sultan qalalyq Polıtsııa departamentinen málim etti, dep habarlaıdy QazAqparat tilshisi.

«Eki kúdikti Á. Bókeıhan kóshesi boıyndaǵy úıdiń aýlasynda turǵan tólem termınalyn tańdap alyp, túngi ýaqytta bolgarkanyń kómegimen kesken. Sodan keıin aqsha salynǵan jáshigin alyp ketken. Osy maqsatta olar bir kún buryn qurylys dúkeninen bolgarkany jalǵa alǵan», - dep atap ótedi Polıtsııa departamentinen.

Vedomstvo málimetinshe, qaskúnemderdiń termınaldy kesip jatqan sáti vıdeoǵa túsip qalǵan. Kúdiktiler alyp ketken aqsha salatyn jáshikte nebári 20 myń teńge ǵana bolǵan.

«Jedel izdestirý is-sharasy barysynda polıtsııa qyzmetkerleri 26 jastaǵy eki kúdiktini turǵylyqty jerlerinen ustady. Olardyń biri urlyq jasaǵany úshin buǵan deıin sottalǵan. Atalǵan fakti boıynsha sotqa deıingi tergeý júrgizilip jatyr. Kúdiktiler Polıtsııa departamentiniń ýaqytsha ustaý oqshaýlaǵyshyna qamaldy», - delingen taratylǵan aqparatta.