Bolgarııanyń Plovdıv qalasynda Qazaqstannyń qurmetti konsýldyǵy ashyldy
Qazaqstan Elshisi Vıktor Temirbaev Bolgarııanyń ekinshi iri qalasy – Plovdıvke resmı saparmen bardy, dep habarlaıdy Kazinform Cyrtqy ister mınıstrliginiń baspasóz qyzmetine silteme jasap.
Sapar aıasynda basty is-shara retinde Qazaqstannyń Plovdıvtegi qurmetti konsýldyǵynyń saltanatty ashylý rásimi boldy. Qurmetti konsýl bolyp Ońtústik-Shyǵys Eýropadaǵy eń iri ekonomıkalyq aımaqtarynyń biri Trakııa ekonomıkalyq aımaǵynyń negizin qalaýshy jáne basqarma tóraǵasy Plamen Panchev taǵaıyndaldy. Іs-sharaǵa Plovdıv oblysynyń meri I. Zıýmbılev, qalalyq ákimshiliktiń basshylyǵy, qoǵamdyq, isker, ǵylymı jáne mádenı ortanyń ókilderi qatysty.
Elshi V.Temirbaev elder arasyndaǵy qarym-qatynastyń joǵary deńgeıin atap ótip, Bolgarııa Qazaqstannyń Balqandaǵy eń iri saýda jáne ekonomıkalyq seriktesteriniń biri ekenin atap ótti.
Qazaqstandyq dıplomat elimizdiń iri ónerkásiptik, mádenı jáne týrıstik oblystarynyń biri – Plovdıv óńirinde Respýblıkanyń Táýelsizdik kúni qarsańynda Qazaqstannyń Qurmetti konsýldyǵyn ashýdyń sımvoldylyǵyn jáne mańyzdylyǵyn atap ótti. Onyń aıtýynsha, bul bizdiń elderimizge aýyl sharýashylyǵy, mashına jasaý, munaı-hımııa jáne toqyma ónerkásibi salasyndaǵy birlesken jobalardy iske asyrýda ózara is-qımyldy jandandyrýǵa múmkindik beredi.
Plovdıv oblysynyń meri I.Zıýmbılev is-sharaǵa qatysýshylardyń aldynda sóz sóılep, Qazaqstannyń joǵary ekonomıkalyq jáne ınvestıtsııalyq áleýetin atap ótip, elimizdiń qarqyndy damýyna nazar aýdardy.
Qazaqstannyń Qurmetti konsýly P.Panchev qazaqstandyq taraptyń kórsetken joǵary senimi úshin alǵysyn bildirip, bekitilgen óńirlermen Qazaqstannyń ekonomıkalyq jáne mádenı-gýmanıtarlyq ózara is-qımylyn jandandyrýǵa daıyn ekendigi rastady.
Buǵan deıin, Elshi V.Temirbaevtyń Plovdıv qalasynyń jańadan saılanǵan meri Kostadın Dımıtrovpen kezdesýinde áńgimelesýshiler saýda-ekonomıkalyq jáne mádenı-gýmanıtarlyq baılanystardyń údemeli damýyndaǵy óńiraralyq ózara is-qımyldyń mańyzdy rólin atap ótip, ekijaqty kún tártibindegi ózekti máselelerdi talqylady. Atap aıtqanda, óńiraralyq deńgeıde ekijaqty qarym – qatynastardy arttyrý maqsatynda Qazaqstannyń úshinshi megapolısi – Shymkentpen baýyrlas baılanystar ornatýǵa erekshe nazar aýdaryldy.
Óz kezeginde K.Dımıtrov Qazaqstanmen óńiraralyq qatynastardy damytýǵa óziniń daıyndyǵyn bildirip, ózara tıimdi áriptestikti odan ári nyǵaıtý jónindegi bastamalardy qoldaıtyndyǵyna sendirdi.
Bilim berý salasyndaǵy yntymaqtastyqty nyǵaıtý maqsatynda Elshi V.Temirbaev Plovdıvte ornalasqan Bolgarııanyń jetekshi joǵary oqý oryndarynyń rektorlary jáne basshylyǵymen kezdesý ótkizdi. Kezdesý barysynda qazaqstandyq dıplomat qatysýshylardy elimizdiń eń joǵary ıgiligin beıneleıtin Táýelsizdik kúniniń erekshe mártebesi men tarıhı qundylyǵymen tanystyryp, ári qaraı qazaqstandyq jáne bolgar túrli beıindi oqý oryndary arasyndaǵy yntymaqtastyq perspektıvalaryna qatysty jan-jaqty pikir almasý ótti.
Bolgar professorlary ózderi basqaratyn oqý oryndarynyń eýropalyq negizdegi bilim berý sapasyn arttyrý saıasatyn iske asyrý tájirıbesimen, sondaı-aq sheteldik joǵary oqý oryndarymen halyqaralyq yntymaqtastyqty damytý josparlary men basymdyqtarymen bólisti.
2025 jylǵa qaraı 100 myń IT mamandardy daıarlaý jónindegi memlekettik mindetti oryndaýǵa qosqan úles turǵysynan Qazaqstan Elshisi Bolgarııa joǵary oqý oryndarynyń basshylaryn baılanys ornatýǵa jáne oqý jelisi boıynsha odan ári ózara tıimdi áriptestik ornatýǵa jaqsy múmkindik beretin «International Education Fair» (Astana jáne Almaty, 2024 j. kóktem) halyqaralyq bilim berý kórmesine qatysýǵa shaqyrdy. Sonymen qatar qazaqstandyq dıplomat stýdenttermen almasý, oqytýshylar quramynyń biliktiligin arttyrý kýrstaryn uıymdastyrý jáne stýdenttik praktıka jelisi boıynsha baılanystar tájirıbesin keńeıtýdi usyndy.
Plovdıv – Bolgarııanyń ekinshi úlken qalasy jáne jetekshi ekonomıkalyq jáne ónerkásiptik ortalyqtarynyń biri. Plovdıv –Eýropadaǵy eń kóne qalalardyń biri jáne Bolgarııanyń ońtústigindegi eń qarqyndy damyp kele jatqan ortalyq bolyp sanalady.
