Bolgarııanyń eks-prezıdenti parlamenttik saılaýǵa qatysatynyn rastady
ASTANA. KAZINFORM – Bolgarııanyń burynǵy prezıdenti Rýmen Radev merziminen buryn ótetin parlamenttik saılaýǵa qatysatynyn, alaıda saıası qozǵalysyn saılaýdan keıin quratynyn málimdedi. Bul týraly ol memleket basshysy qyzmetinen ketkennen keıin Bolgarııa ulttyq telearnasyna bergen alǵashqy televızııalyq suhbatynda aıtty, dep habarlaıdy TASS.
«Partııany saılaýdan keıin quramyn, sebebi qazirgi jaǵdaıda merziminen buryn ótetin saılaýǵa qatysa alatyn partııa qurý múmkin emes. Ol úshin keminde úsh aı ýaqyt qajet, al qazir bizde ondaı múmkindik joq. Sondyqtan saılaýǵa qatysý úshin ózge tetikter paıdalanylady. Degenmen partııa mindetti túrde qurylady. Men naqty saıasatqa osy maqsatpen keldim», – dedi eks-prezıdent.
Sarapshylardyń baǵalaýynsha, onyń Bolgarııa premer-mınıstri ataný múmkindigi joǵary.
Onyń aıtýynsha, basty maqsat – Bolgarııany erkin, demokratııalyq ári zamanaýı eýropalyq memleket retinde damytý.
«Bul úshin eldi basqarýdyń qazirgi modelin joıyp, memlekettilikti nyǵaıtý qajet», – dep atap ótti ol.
19 qańtarda, memleket basshysy retinde alǵash ant qabyldaǵanyna toǵyz jyl tolǵan kúni Radev ultqa úndeý jasap, otstavkaǵa ketetinin jáne jaqtastarymen birge merziminen buryn ótetin parlamenttik saılaýǵa qatysatynyn habarlaǵan. Bul saılaý parlamenttegi partııalardyń jańa úkimet qurý jóninde kelisimge kele almaýynan keıin ótkizilýi tıis boldy.
Radevtiń saılaýǵa qatysý týraly sheshimi bolgar saıası ortasynda qyzý talqylaý týdyrdy. Kóptegen sarapshylar eks-prezıdenttiń qatysýy saılaýshylardyń qyzyǵýshylyǵyn arttyryp, eldi daǵdarystan shyǵara alatyn jańa parlamenttik kópshilik qalyptastyrýǵa yqpal etýi múmkin degen pikir bildirdi.
Sońǵy bes jyl ishinde Bolgarııada saılaý segizinshi ret ótkizilmek. Onyń kúnin prezıdent Ilııana Iotova parlamentte usynylǵan partııalarmen keńes ótkizgennen keıin, tehnıkalyq úkimettiń mınıstrleri men premer-mınıstrin taǵaıyndaý arqyly anyqtaıdy. Premer-mınıstr laýazymyna bes kandıdat úmitker bolyp otyr.